BAKI, 21 sen — Sputnik. ABŞ-ın Şimali Karolina ştatında polisin qaradərili vətəndaşı öldürməsi Şarlott şəhər sakinlərinin ciddi etirazına səbəb olub. Şəhər əhalisi polis zorakılığına qarşı geniş aksiyalara başlayıb.
Sputnik xəbər verir ki, bu barədə Reuters agentliyi məlumat yayıb. Xəbərə görə, hadisə sentyabrın 20-də, Şarlott şəhərinin şimal-şərqində, polis əməkdaşlarının şübhəli şəxsi axtardıqları zaman baş verib. Polislər şəxsi avtomobilinə minən afroamerikalıya xəbərdarlıq etmədən atəş açıblar. Nəticədə o, ağır yaralanıb.
Qaradərili xəstəxanaya aparılsa da, onun həyatını xilas etmək mümkün olmayıb. Polisdəki mənbənin sözlərinə görə, öldürülmüş şəxs afroamerika əsilli, 43 yaşlı Lamont Skottdur. Maraqlısı odur ki, Lamont özü də polis əməkdaşıdır.
Skottun ailəsi bildirib ki, o, övladını məktəbdən gətirməyə gedibmiş. Bu hadisədən sonra sakinlər Lamont Skottun polis tərəfindən öldürülməsinə etiraz əlaməti olaraq kütləvi aksiya keçiriblər. Onlar mərkəzi magistralı bağlayıblar.
