BAKI, 15 sen — Sputnik. Bu gün Azərbaycanda 2016-2017-ci tədris ilinə start verilib. Azərbaycanın bütün orta və ali məktəblərinin şagird və tələbələri səhər saat 8-də oxuyacaqları təhsil ocağında olublar.
"Bilik günü" ölkədəki bütün ümumtəhsil məktəblərində təntənəli şəkildə qeyd olunub. Bu gün 1-ci sinfə qədəm qoyanlar üçün xüsusilə əlamətdar olub. 1-cilər yeni məktəbli geyimləri, çantaları, əllərində gül dəstələri ilə məktəblərə yollanıblar.
Sputnik Təhsil Nazirliyinin saytına istinadla xəbər verir ki, bu il ölkə üzrə 164 033 nəfər şagird I sinfə gedəcək. 4 472 ümumi təhsil müəssisəsində təhsil alacaq şagirdlərin ümumi sayı isə 1 415 242 nəfər təşkil edəcək.
Yeni dərs ilində Bakı şəhəri üzrə 43 397 şagird I sinfə gedəcək. Məlumatda bildirilir ki, 35561 nəfər Azərbaycan bölməsində, 7836 nəfər isə rus bölməsində təhsil alacaq. I sinfə gedən şagirdlərdən 40686 nəfəri 6 yaşı tamam olanlar, 2711 nəfəri isə 6 yaşı tamam olmayanlardır.
Bakı şəhəri üzrə lisey və gimnaziyaların I siniflərinə isə 2450 nəfər şagird gedəcək. Onlardan 2115 nəfəri 6 yaşı tamam olanlar, 335 nəfəri 6 yaşı tamam olmayanlardır. Bakı Şəhəri üzrə Təhsil İdarəsinin tabeliyində olan məktəblərdə yeni tədris ilində 354 573 nəfər şagird təhsil alacaq.
Yeni tədris ilində ölkə üzrə 29 yeni məktəb istifadəyə verilib (o cümlədən, Təhsil Nazirliyinin sifarişi ilə 7 məktəb). 101 məktəbdə əsaslı (onlardan 84-ü Təhsil Nazirliyinin sifarişi ilə), 384 məktəbdə cari təmir işləri aparılıb. 10 təhsil müəssisəsinin tikintisi isə davam edir.
Yeni tədris ilində Təhsil Nazirliyinin Əsaslı Tikinti və Təchizat İdarəsinin sifarişi ilə 2 internat məktəbi əsaslı təmir olunub, "Bilik günü"ndə istifadəyə verilib.
