BAKI, 7 sen — Sputnik. "Barak Obama məndən xahiş etdi ki, İŞİD-in nəzarətindəki Raqqa şəhərinə türk və amerikan əsgərləri birgə əməliyyat başlatsın".
Sputnik Daily Sabah-a istinadən xəbər verir ki, bunu Türkiyə prezidenti Rəcəb Tayyib Ərdoğan Çindəki G-20 sammitindən ölkəsinə qayıdarkən təyyarədə jurnalistlərə bildirib. Ərdoğan Obamanın xahişinə hansı cavabı verdiyini də açıqlayıb: "Obamanın xahişinə cavab olaraq dedim ki, bu Türkiyə üçün problem deyil. Hərbçilərimiz bir araya gəlsinlər, nə lazımdırsa etsinlər".
Jurnalistin "İŞİD Raqqada çox güclüdür. Belə bir əməliyyat risk deyilmi?" sualını da cavablandıran prezident deyib ki, "əsl risk İŞİD-in Raqqada güclənməsidir".
"Artıq, bölgədə var olduğumuzu göstərməliyik. Geriyə doğru addım atsaq, həmin ərazilərə PKK, YPG, PYD və İŞİD terrorçuları yerləşəcək", — deyə Ərdoğan əlavə edib.
Türkiyə Prezidenti hazırda Rusiya və ABŞ-la koordinasiya halında olduqlarını, Suriyanın şimalında TAMPON bölgəni necə qura biləcəkləri barədə üç tərəfli danışıqlar apardıqlarını bildirib.
Ərdoğanın diqqət çəkən bəyanatını Sputnik-ə dəyərləndirən türkiyəli jurnalist-yazar Ömər Dinçər, gözdən qaçan daha bir məqamı yada salıb: "Ərdoğan jurnalistlərə Obama ilə görüşü zamanı müzakirə edilən daha bir detalı da açıqlayıb. ABŞ prezidenti türkiyəli həmkarından Raqqa üçün hərbi dəstək istəyən zaman, Ərdoğan Fətullah Gülən məsələsini Obamanın yadına salıb. Prezident bu üz-üzə görüşmədə amerikalı həmkarına Fətullah Gülənin Türkiyəyə verilməli olduğunu, ya da ABŞ-da həbs edilməsini istədi. Məhz bu şərti irəli sürəndən sonra Ərdoğan, İŞİD-in qalası sayılan Raqqa şəhərinə ABŞ ordusu ilə birgə türk ordusunun daxil ola biləcəyini söylədi".
Dinçərə görə, Raqqa əməliyyatı bir-iki günə başlanacaq bir əməliyyat deyil: "Raqqa Suriyanın ən böyük şəhərlərindən biridir. İŞİD-in ən güclü mərkəzidir. Hətta, paytaxtıdır deyə bilərik. Bu şəhərə əməliyyata başlamaq üçün aylar öncədən strateji planlar qurulmalıdır. Çünki şəhərdə tək İŞİD terrorçuları yoxdur. Yüzminlərlə sivil yaşayır orada. Elə etmək lazımdır ki, ən az zərərlə bu işin öhdəsindən gəlinsin".
Hərbi ekspert Üzeyir Cəfərli də hesab edir ki, artıq İŞİD-in yox edilməsinin vaxtı çoxdan çatıb. O, Sputnik-ə açıqlamasında bildirib ki, əslində sözügedən əməliyyat çoxdan həyata keçirilməli idi: "Görünür, İŞİD-in dünyada yaratmış olduğu təhlükə aparıcı dövlətləri təxirəsalınmaz addımlar atmağa məcbur edib".
"Raqqa Suriyanın ən böyük şəhərlərindən biridir. Yüzminlərlə sivilin orada yaşaması, əlbəttə əməliyyat işini nisbətən çətinləşdirə bilər. Ancaq yadınıza salım ki, həm türk, həm də amerikan ordusunun sivillər yaşayan şəhərlərdə hərbi əməliyyat keçirmə qabiliyyətləri var. Bu, dəfələrlə sınanıb və uğurlu da alınıb", — Cəfərli qeyd edib.
O, əməliyyat zamanı itkilərin olacağını da istisna etməyib: "Əlbəttə, həm əsgərlərdən, həm də sivil insanlardan həyatını itirənlər olacaq. Çünki zombiləşmiş İŞİD terrorçuları son anda intihar edərək, başqalarının da ölməsinə çalışacaqlar. Ancaq yenə deyirəm, bundan geriyə dönüş yoxdur. Bu təhlükəni yox eləməyin vaxtı çoxdan çatıb".
"Obamanın Ərdoğana təklifini müsbət dəyərləndirirəm. Bu, çox yerində və doğru təklifdir". Bunu isə Sputnik-ə açıqlamasında politoloq Qabil Hüseynli deyib.
Onun sözlərinə görə, belə bir əməliyyat planı çoxdan var idi: "Əslində belə bir plan çoxdan var idi. Türk və ABŞ quru və hava qoşunları hələ bir neçə il öncə Raqqa şəhərinə girməli idi. Ancaq daha sonra Vaşinqton geri çəkildi və bu əməliyyat baş tutmadı. İndi isə, ABŞ görür ki, Türkiyə təkbaşına Suriyada İŞİD-ə qarşı hərbi əməliyyat keçirir, özünün də bu əməliyyatda iştirak etməsini istəyir".
