Şahpəri Abbasova, Sputnik Azərbaycan
Dünyanın mürəbbəsevərləri növbəti dəfə Qəbələyə toplaşıb.
Sputnik-in məlumatına görə, avqustun 27-də Qəbələdə IV Beynəlxalq Mürəbbə Festivalı açılıb.
Festival Mədəniyyət və Turizm Nazirliyi, Qəbələ Rayon İcra Hakimiyyəti, Azərbaycan Milli Kulinariya Mərkəzi və Azərbaycan Milli Kulinariya Assosiasiyasının birgə təşkilatçılığı ilə keçirilib.
Ölkəmizin mədəniyyət və milli kulinariyasını təbliğ etmək məqsədilə IV dəfədir ki, keçirilən festivalda bu il 10 xarici ölkənin (Türkiyə, İran, Çin, Qana, Gürcüstan, Rusiya, Şimali Kipr, Ukrayna, Özbəkistan) kulinarları ilə yanaşı, Azərbaycanın 30 şəhər və rayonundan gələn 500-ə yaxın iştirakçı müxtəlif çeşiddə hazırladıqları mürəbbələri nümayiş etdiriblər. Rayon rəhbərliyi və festivalın münsiflər heyətinin üzvləri əvvəlcə şirniyyatçıların hazırladığı süfrələrə yaxınlaşaraq samovar çayı ilə müxtəlif çeşiddə olan mürəbbələri dadıblar. Burada həmçinin satış yarmarkası da təşkil edilib.
Müsabiqəyə gilas, böyürtkən, çiyələk, heyva, qoz, ərik, gül, gavalı və digər mürəbbələr təqdim edilib. Həmçinin bənövşə, nanə, itburnu, qarğıdalı, cır alça, xiyar, pomidor, yerkökü, sarı moruq, badımcan və yemiş mürəbbələri iştirakçıların marağına səbəb olub.
Festival çərçivəsində həmçinin müsabiqə də keçirilib. Bunun üçün xüsusi komissiya yaradılıb. Münsiflərin rəyi əsasında ən yaxşı mürəbbə hazırlayan şəxslər 3 nominasiya üzrə qalib elan olunub. Festival üzrə qalib olan ən yaxşı təqdimata görə birinci yerə Ukrayna, ikinci yerə Şimali Kipr Türk Cumhuriyyəti, ən yaxşı mürəbbə nominasiyası üzrə birinci yerə İran, ikinci yerə Çin, növ müxtəlifliyinə görə birinci yerə Özbəkistan, ikinci yerə Türkiyə layiq görülüb. Azərbaycan üzrə isə növ müxtəlifliyinə görə birinci yerə Bakı, ən yaxşı təqdimata görə birinci yerə Xaçmaz rayonu layiq görülüb. Festivalda münsiflər heyəti üzvlərinin rəyi əsasında ən yaxşı mürəbbə hazırlayanlar müxtəlif nominasiyalar üzrə mükafatlandırılıb. Festival konsert proqramı ilə davam edib.
Son illər müxtəlif beynəlxalq mədəni tədbirlərə, festivallara ev sahibliyi edən Qəbələdə mürəbbə ustalarının yarışması ilk dəfə 2013-cü ildə keçirilib. Həmin festivalda respublikamızın 11, sonrakı il 20, 2015-ci ildə isə 30 şəhər və rayonundan, eləcə də beş xarici ölkədən şirniyyatçıların iştirak etməsi bu tədbirə marağın getdikcə artmasından xəbər verir. Ötən il keçirilən beynəlxalq festivalda Türkiyə, Rusiya, İran, Serbiya, Qırğızıstan şirniyyatçıları öz məhsullarını nümayiş etdiriblər. Xalqımızın qeyri-maddi mədəni irsinin qorunub saxlanmasına xidmət edən layihə bölgədə turizmin təşviqinə də töhfədir.
Festival bu gün başa çatacaq.
