BAKI, 25 avq — Sputnik. "Mən onların belə olduğunu bilmirdim. Ölkəmin və prezidentimin yanındayam".
Sputnik Milliyet-ə istinadən xəbər verir ki, bunu Türkiyə futbol millisinin və Qalatasaray futbol klubunun keçmiş üzvü Hakan Şükür, Fətullah Gülən şəbəkəsi barədə öz Twitter səhifəsində yazıb. O, ailəsindən heç kimin F. Gülən şəbəkəsinə bağlı olmadığını, habelə bu qruplaşmanın etdiklərindən məyus olduğunu qeyd edib.
"Seçilmiş prezidentimizə, hökumətimizə və demokratiyamıza qarşı törədilən xain təşəbbüsü bir daha lənətləyirəm, şəhidlərimizə rəhmət diləyirəm", — məşhur futbolçu vurğulayıb.
Xatırladaq ki, Hakan Şükürün Türkiyədəki daşınmaz əmlakının müsadirə edilməsi haqda məhkəmə qərar verib, atası isə FETÖ-yə maliyyə yardımı göstərməkdə şübhəli bilinərək həbs olunub.
