BAKI, 11 avq-Sputnik. Ekologiya və Təbii Sərvətlər Nazirliyinin Milli Hidrometeorologiya Departamenti Azərbaycan əhalisinə ölkə ərazisində davam edəcək isti hava şəraiti ilə bağlı xəbərdarlıq edib.
Departamentdən Sputnik-ə daxil olan xəbərdarlıqda bildirilir ki, avqustun 15-dək Bakıda və Abşeron yarımadasında anomal isti hava şəraitinin davam edəcəyi, maksimal temperaturun 35-39, bəzi günlərdə 41 dərəcə isti olacağı gözlənilir.
Azərbaycanın rayonlarında avqustun 15-dək havanın maksimal temperaturu 35-40, Naxçıvan MR-da və Mərkəzi-Aran rayonlarının bəzi yerlərində 43, dağlıq rayonlarda 29-34 dərəcə isti olacaq.
Nazirlik meteohəssas insanları xüsusilə xəbərdar edib ki, yaxın 3 gün ərzində Abşeron yarımadasında gözlənilən güclü isti temperatur, diskomfort şərait əksər əhali üçün əlverişsiz, meteohəssas insanlar üçün isə çox təhlükəlidir. Odur ki, uzun müddət açıq havada olmaq məsləhət deyil.
