Şahpəri Abbasova, Sputnik Azərbaycan
BAKI, 9 avq-Sputnik. Şəkidə ağır yol qəza hadisəsi baş verib.
Şəhərin 20 yanvar küçəsində Şəki şəhər sakini 1956-ci il təvəllüdlü Süleymanov Şirəli Ənvər oğlu 90-HR-055 dövlət nömrə nişanlı NİVA markalı avtomobildə idarəetməni itirib.
O, yolun kənarında dayanan Şəki rayon Orta Zəyzid kənd sakini Əhmədov Sərxan Oruc oğlunu vuraraq çaya düşüb. Hadisə yerinə dərhal Fövqəladə Hallar Nazirliyinin Dövlət Yanğından Mühafizə Xidmətinin yanğınsöndürən-xilasediciləri cəlb olunub.
Minik avtomobilində sıxılmış vəziyyətdə qalan sürücü avtomobildən çıxarılıb. Hər iki şəxs müxtəlif dərəcəli bədən xəsarətləri ilə Şəki Rayon Mərkəzi Xəstəxanasına yerləşdiriliblər.
Xəstəxanadan Sputnik-ə verilən məlumata görə, Əhmədov Sərxan yüngül bədən xəsarəti alıb. Ona ilkin tibbi yardım göstərilib və evə buraxılıb. Sürücü Süleymanov Şirəli isə reanimasiya şöbəsinə yerləşdirilib. Vəziyyəti orta ağırdır.
Faktla bağlı Şəki rayon polis şöbəsində araşdırma aparılır.
