BAKI, 6 avq-Sputnik. Türkiyənin enerji və təbii ehtiyatlar naziri Berat Albayrak deyib ki, Türkiyə iqtisadiyyatına verdiyi töhfələrə və sıx əməkdaşlığa görə SOCAR-a dəstəyi davam etdirəcəklər.
Sputnik-in məlumatına görə, bir neçə gün əvvəl Azərbaycan Dövlət Neft Şirkətinin (SOCAR) prezidenti Rövnəq Abdullayevlə görüşən Albayrak Trans-Anadolu Qaz Boru Kəməri (TANAP) və STAR neft emalı zavodu kimi birbaşa investisiya layihələrinin Türkiyədə əlavə dəyər, ixracat, məşğulluq və müasir texnologiyalar sahəsində xüsusi yeri olduğunu vurğulayıb.
Nazir SOCAR-ın əsas səhmdarı olan "Petkim (Petrokimya) Holding A.Ş."də Fətullahçı terror təşkilatına (FETÖ) qarşı keçirilən əməliyyatlara da toxunub:
"Təəssüf ki, bunlar hər struktur kimi, özəl sektorun da içərisinə sızıblar. Birbaşa milləti hədəf alan bu terror təşkilatına qarşı bütün dövlət idarələrində olduğu kimi, özəl sektorda da zəruri addımlar atılmaqda, tədbirlər görülməkdədir. "Petkim"in Aliağadakı ərazisində aparılan yoxlamalar da bu çərçivədə atılan addımlardandır. SOCAR-la birbaşa əlaqəsi olmadığı kimi, "Petkim"dəki rəhbər şəxslər də bu məsələdə polislərlə əməkdaşlıq ediblər".
Qeyd edək ki, Berat Albayrak Türkiyə prezidenti Rəcəb Tayyib Ərdoğanın kürəkənidir. O, 15 iyulda baş verən çevrilişə cəhddən sonra FETÖ-nün xarici iqtisadi əlaqələr sektorundakı fəaliyyətinin qarşısını almaq istiqamətində işlər görür. SOCAR rəhbərliyinin Fətullah Gülənə yaxın olduğu bürədə Azərbaycan və Türkiyə mediasında yer alan məlumatlardan sonra, bu şirkətlə Türkiyə rəhbərləri arasında vacib görüşlər keçirilib.
SOCAR prezidenti Rövnəq Abdullayev avqustun 2-də Ankarada keçirilən Beynəlxalq İnvestorlarla Yüksək Səviyyəli İqtisadi Dialoq toplantısından sonra Berat Albayraq və Rəcəb Tayyib Ərdoğanla görüşərək münasibətləri yoluna qoyub.
