BAKI, 26 iyul — Sputnik. Müdafiə Sənayesi Nazirliyinin (MSN) rəhbərliyi, o cümlədən nazir Yavər Camalov, Şirvan "Araz" zavodunda baş vermiş hadisə ilə əlaqədar hadisə yerinə yollanıb.Bu barədə ölkə.az-a MSN-in ümumi şöbəsinin rəisi Bəxtiyar Əsədov məlumat verib.
Nazirlik rəsmisi bildirib ki, hadisənin hansı səbəbdən baş verdiyini aydınlaşdırmaq üçün araşdırma aparılır: "Yanğın söndürüləndən sonra ərazidə daha geniş araşdırma aparılacaq və partlayışın dəqiq səbəbi aydınlaşdırılacaq".
Qeyd edək ki, bu gün saat 15:35 radələrində, Müdafiə Sənayesi Nazirliyinə məxsus Şirvan "Araz" zavodunda partlayış baş verib. Partlayış nəticəsində 12 nəfər xəsarət alıb. Səhiyyə Nazirliyinin (SN) mətbuat xidmətinin rəhbəri Liya Bayramovanın Sputnik-ə verdiyi məlumata görə, xəsarət alanlar ilkin olaraq Şirvan Şəhər Mərkəzi Xəstəxanasına yerləşdirilib, onların vəziyyəti ağırdır.
Hazırda təcili yardım briqadaları hadisə yerindədir. Köməyə ehtiyacı olan yaralıların xəstəxanaya gətirilməsi davam etdirilir.
