BAKI, 21 iyul — Sputnik. Şəki şəhərində Beynəlxalq Şirniyyat Festivalı keçirilib. Sputnik-in bölgə müxbiri xəbər verir ki, festivalda 6 xarici ölkədən kulinarlar, Azərbaycanın 23 rayonunun nümayəndə heyəti, Şəki üzrə isə 17 kollektiv iştirak edib.
XVIII əsrə məxsus memarlıq kompleksi olan Yuxarı Karvansaray Mehmanxana Kompleksində təşkil edilən festivalda iştirakçılar öz bölgələrinə xas, əvvəlcədən hazırlanmış müxtəlif növ şirniyyat məhsullarını nümayiş etdiriblər. Mədəniyyət və turizm nazirinin birinci müavini Vaqif Əliyev, Şəki Şəhər İcra Hakimiyyətinin başçısı Elxan Usubov və Azərbaycan Milli Kulinariya Mərkəzinin prezidenti Tahir Əmiraslanov stendlərə baxış keçiriblər.
Daha sonra tədbirin rəsmi hissəsi başlayıb. Çıxış edənlər bu festivalın keçirilməsinin əhəmiyyətindən, ölkəmizin mədəniyyətinin və mətbəxinin təbliğində rolundan bəhs ediblər. Artıq beynəlxalq festivallar mərkəzinə çevrilən Şəkinin bu tədbirə ev sahibliyi etməsinin əhəmiyyəti xüsusi vurğulanıb, festivalın bir ənənəyə çevriləcəyi bildirilib. Bu festivalda İran, Hindistan, Rusiya, Yunanıstan və digər xarici ölkələrin milli şirniyyat məhsulları nümayiş etdirilib.
"Çox şadam ki, belə tədbirlərimiz Şəkidə ənənəyə çevrilir və biz də İcra Hakimiyyəti tərəfindən, İcra Hakimiyyətinin komandası tərəfindən artıq bunu yüksək səviyyədə bacarırıq", — E. Usubov bildirib.
Daha sonra müxtəlif kollektivlərin ifasında milli musiqi və rəqs də nümayiş etdirilib. Bu müddət ərzində isə xarici ölkə nümayəndələrindən ibarət münsiflər heyəti iştirakçıların stendlərini qiymətləndirib və qalibləri müəyyənləşdirməyə çalışıb. Seçimin obyektiv aparılması üçün münsiflər heyəti iki gün ərzində çalışıb, müxtəlif şirniyyat növləri, onların hazırlanması qaydaları ilə yaxından tanış olublar.
"Münsiflər heyətinin rəhbərləri xaricilərdir. Onlar heç kimi tanımırlar və hal-hazırda müzakirə gedir. Hansı şəhərə, hansı ölkəyə mükafat veriləcəyini biz bilmirik", — Tahir Əmiraslanov qeyd edib.
Festivalın sonunda qaliblərə, təşkilatçı və sponsorlara diplom və hədiyyələr təqdim edilib. Qeyd edək ki, Azərbaycanda belə festival bu günədək dörd dəfə keçirilib. Əvvəlki festivallar paytaxt Bakıda baş tutsa da, bu il ilk dəfə Şəkidə keçirilməsi daha məqsədəuyğun sayılıb. Əsas səbəb isə Şəki şirniyyatlarının özünəməxsusluğu ilə seçilməsidir.
