BAKI, 14 iyul — Sputnik. Gəncənin lalə düzənlikləri həmişə məşhur olsa da, Qax öz lalələri ilə heç də geri qalmır. Lalə yazda novruzgülündən sonra açan ilk çiçəkdir. 1-2 aya yaxın ömrü olur.
Divan ədəbiyyatında lalə qırmızı rəngi ilə sevgilinin yanağına və aşiqin göz yaşlarına bənzədilir. Lalənin ortasındaki qara rəng sevgilinin yanaqlarında etina və qısqanma hissindən meydana gəlmiş bir yaradır.
Türklər hələ Tyan-Şan dağlarının şimal yamaclarında yaşayarkən yetişdirdikləri lalə soğanlarını əkib-becərmişlər. Onlar sonralar qərbə köç edərkən bu soğanlardan da özləri ilə götürmüşlər. Beləcə türk hara gedibsə, orada lalə əkilərək, nəvazişlə bəslənərək çoxaldılıb.
Haqqında bir çox əfsanələr söylənməkdədir. Bu miflərdən birində nəql edilir ki, bir yarpağın üzərinə ildırım düşür və yarpaq alovlanaraq yanır. Bu vəziyyətdə də donub qalmış yarpaq, bu gün gördüyümüz laləyə çevrilir. Lalənin göbəyindəki quruluq da üstünə düşən həmin ildırımdan qalan yanıq izidir.
Əgər bir aşiq candan əziz bildiyi sevgilisinə qırmızı lalə təqdim edərsə, bu, "gözəlliyinlə ürəyimə od saldın, eşqinlə kül olub yandım" mənasını ifadə edirmiş.
Digər bir əfsanəyə görə isə, Şirinə aşiq olan Fərhad sevgilisinin ölüm xəbərini eşidincə, bu acıya tab gətirməyib, əlindəki baltayla özünü doğramağa başlayıb. Axan qanın torpağa hopan hər damcısından bir qırmızı çiçək bitirmiş.
