BAKI, 1 iyul — Sputnik. "8-ci kilometr" qəsəbəsində yerləşən, keçmiş "maşın bazarı"nda güclü yanğın olması barədə xəbər vermişik. Bu gün səhər saatlarında isə mağazaları külə dönən sahibkarlar bazarın qarşısına toplaşaraq etiraza başlayıblar.
Mağaza sahiblərinin Sputnik-ə verdikləri məlumata görə, yanğın qəsdən törədilib. Sahibkarların çoxu hadisəyə görə bazarın sahibi Rasim Salmanovu günahlandırır.
Vüsal Həsənov adlı sahibkar, mağazasında 1 çöp belə, qalmadığını, yarım milyon manat ziyana düşdüyünü iddia edib. O, dövlətdən təzminat tələb edəcəklərini qeyd edib: "Ayda 1200 manat arendaya pul verirdik. Bunlar heç bir dükanı sığortalamayıblar. Yarım milyon manat dəyərində malım külə dönüb".
"İndi mən nə edəcəm? Kimə üz tutacağımızı bilmirik. Təzminat tələb edəcəyik, amma bilmirik kimdən? Allah Rasimin başına daş salsın", — sahibkar şikayətini belə ifadə edib.
Digər bir sahibkar Anar Eyvazlı Sputnik-ə açıqlamasında ona dəyən zərərin 250 min manat məbləğində olduğunu deyib: "20 ildə çəkdiyimiz əziyyət 2 saatda yox oldu. Bütün pullarımız, malımız 2 saatda külə döndü. Həqiqətən nə baş verdiyini anlaya bilmirəm. Durduğumuz yerdə bu hadisə necə baş verdi, mənə hələ də çatmır".
Bazarda işləyən, amma adının açıqlanmasını istəməyən bəzi sahibkarlar isə ilginc iddia səsləndiriblər. Onların sözlərinə görə, yanan əraziyə sahiblənmək üstündə bir neçə iri biznesmen mübarizə aparırmış.
"Güman edirik ki, bazar onların mübarizəsinin qurbanı oldu. Kimsə bu ərazini ələ keçirmək istəyir", — Sputnik-ə danışan sahibkarlar bildiriblər.
Hazırda ərazidə mağazalara dəyən ziyanın miqdarının dəqiqləşdirilməsi üzrə işlər aparılır. Bazarın girişində post quran Xətai Rayon Polis İdarəsinin əməkdaşları yanan əraziyə heç kim buraxmırlar.
İlkin ehtimala görə, yanğına qısa elektrik qapanması səbəb olub. Ancaq satıcılar iddia edirlər ki, yanğın zamanı, yəni axşam saat 20:00-da bazarda işıqlar sönülü olub və hadisənin bu səbəbdən baş verməsinə inanmırlar.
Fövqəladə Hallar Nazirliyinin mətbuat xidmətinin yaydığı məlumata görə, Bakı şəhəri, Xətai rayonunda ümumi sahəsi 3000 kv.m olan avtomobil ehtiyat hissələri satışı bazarında mağazaların, piştaxtaların yanar konstruksiyaları və içərisində olan müxtəlif boyalar və avtomobil ehtiyat hissələri olan 930 kv.m sahəsi yanıb. Bazarın qalan hissəsi yanğından mühafizə olunub. Yanğın saat 22:59-da yanğınsöndürənlər tərəfindən söndürülüb.
