BAKI, 1 iyul — Sputnik. Besim Ömər Akalın Türkiyədə müasir ginekologiya elminin əsas simalarındandır. Ölkədə ilk doğum evi açan, bu sahədə ilk müasir kitab nəşr edən insandır.
Sputnik milliyet-ə istinadla xəbər verir ki, 1912-ci ilin may ayında Nyu-Yorkda keçiriləcək Qızıl Xaç konfransına qatılmaq üçün bir ay əvvəldən "Titanik" gəmisində özünə yer alır. Gəminin ilk dayanacağı Fransanın Cherbourq şəhəri idi və Besim Ömər oraya qatarla getməyi planlaşdırırdı.
Otel işçisindən onu səhər tezdən oyatmasını istəmişdi. Ancaq otel işçisi Besim Ömər Paşanı oyandırmağı unutdu və Besim Ömər qatarı qaçırdı.
O, Cherbourqda yeni səfər üçün gözləmək məcburiyyətində idi. 5 gün sonra gələn xəbər onu şoka saldı. Qaçırdığı gəmi — "Titanik" buz dağı ilə toqquşaraq batmış və 1514 adam həyatını itirmişdi.
Bu fəlakətdən xilas olan Besim Ömər başqa bir gəmiylə Vaşinqtona çatdı və konfransda Osmanlı İmperatorluğunu təmsil etdi. O, bu hadisədən sonra "Yer üzünün ən bəxtiyar insanı mənəm" demişdi.
