BAKI, 27 iyun — Sputnik. Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə yardımı ilə, "Biosfer" İctimai Birliyi tərəfindən həyata keçirilən "Əlilliyi və sağlamlıq imkanı məhdud uşaqlar üçün peşəyönümlü kursların təşkili" layihəsinin icrası çərçivəsində növbəti kurs təşkil olunub. İyunun 25-da Xəzər rayonu, Əhməd Baxşiyev adına 38 saylı Texniki-Yaradıcılıq Mərkəzində (TYM) təşkil olunan kursda, əlilliyi və sağlamlıq imkanı məhdud uşaqlara, müxtəlif yaradıcılıq növləri üzrə biliklər öyrədilib.
Kurs zamanı uşaqlara toxuculuq, hörmə, rəsm çəkmə, suvenir hazırlama və digər peşə sahələrinin incəlikləri aşılanıb və onların həmin sahələr üzrə hazırladıqları əl işlərinə baxış keçirilib. Təşkilat rəhbərliyi təlimçilərin qısa zaman ərzində uşaqlara öyrətdiyi biliklərin təqdirəlayiq olduğunu bildirib və az vaxtda çox iş görüldüyünü qeyd edib.
Qeyd edək ki, bu, "Biosfer" İB tərəfindən, "Əlilliyi və sağlamlıq imkanı məhdud uşaqlar üçün peşəyönümlü kursların təşkili" layihəsinin icrası çərçivəsində həyata keçirdiyi 3-cü kursdur. Qarşıdakı müddətdə daha bir kursun təşkil olunacağı və sonda bütün proses ərzində uşaqların hazırladıqları əl işlərinin nümayiş olunacağı sərginin keçiriləcəyi vurğulanıb.
