BAKI, 19 iyun-Sputnik. Dünən 90 saylı Ağdaş seçki dairəsi üzrə Milli Məclisə keçirilən təkrar seçkilərin ilkin nəticəsi açıqlanıb.
Sputnik-in məlumatına görə, Mərkəzi Seçki Komissiyasının (MSK) sədri Məzahir Pənahov 90 saylı Ağdaş seçki dairəsi üzrə Milli Məclisə keçirilən təkrar seçkilərdə lider namizədin 85,56 faiz səslə Yeni Azərbaycan Partiyasının namizədi Cavid Osmanov olduğunu bildirib.
M.Pənahovun sözlərinə görə, sözügedən dairə üzrə bütün seçki məntəqələri hesabat verib. 40 məntəqənin hesabatlarına görə, Ümid Partiyasının namizədi İqbal Ağazadə 7,84 faiz səs toplayaraq ikinci yerdə qərarlaşıb.
Seçkidə 1 yer uğrunda 7 deputatlığa namizəd mübarizə aparıb.
90 saylı Ağdaş seçki dairəsi üzrə Milli Məclisə keçirilən təkrar seçkilərdə seçici fəallığı 57,9 faiz olub, qeydiyyatda olan 40203 seçicidən 23292 seçici səs verib.
Qeyd edək ki, İqbal Ağazadə 2015-ci ilin 1 noyabrında Milli Məclisə keçirilən seçkilərdə namizədliyini 35 saylı Xətai 3-cü seçki dairəsindən irəli sürsə də, həmin dairədən Sosial Demokrat Partiyasının sədri Araz Əlizadə seçilmişdi.
