BAKI, 16 iyun-Sputnik. Bu gün Milli Məclisdə keçirilən "18 iyun — Azərbaycan Respublikasında İnsan hüquqları günü" ilə əlaqədar dinləmələrdə Prezidentin İctimai-siyasi məsələlər üzrə köməkçisi, Prezident Administrasiyasının İctimai-siyasi məsələlər şöbəsinin müdiri Əli Həsənov işbazlıqla və reketlə məşğul olan QHT sədrləri və jurnalistlərdən danışıb.
"Təsəvvür edin ki, heç kim tərəfindən tanınmayan adam böyük bir klinikaya girərək bildirir ki, mən buranı bağlayıram, çünki buranı yoxlayacam. İddia etmirəm ki, Azərbaycanda bu sahə ilə məşğul olan təşkilat və qurumlar bu vəziyyətdədir. Bilirik ki, belələri də var. O rakursdan baxanda istehsalçıların da hüquqlarının müdafiəsinə ehtiyac var." — deyə Əli Həsənov bildirib.
O, xatırladıb ki, bu yaxınlarda Azərbaycan Prezidenti sahibkarlıq subyektlərində 2 illik yoxlamaların aparılmasını qadağan edib. Bundan istifadə edən işbazlar hərə bir QHT adı ilə müəssisələrə gedib yanğın təhlükəsizliyindən tutmuş, istehlakçıların hüquqlarının müdafiəsinə qədər yoxlamalar aparmağa cəhd edirlər.
"Bu yaxınlarda nazirlərdən biri açıq-aşkar zəng edib deyir ki, filan qəzet məni təhdid edir. Açıq formada böhtan yazır. Deyirəm ki, məhkəməyə müraciət edin. O da qeyd edir ki, işimi buraxıb məhkəməyə gedim? Həmin "reket" jurnalistin üzərində 15 məhkəmə qərarı var. Bu anlamda insan hüquqları sözün həqiqi mənasında ictimai davranış normasının dolğunluğundan, təkmilliyindən asılıdır. İctimai davranış normaları hamımızın qanun səviyyəsinə çıxardığımız, o cümlədən normal sayılan davranış qaydalarıdır. Jurnalistin, millət vəkilinin və digərlərinin davranış qaydaları var. Biz icra orqanları maksimum şəkildə çalışırıq ki, həm qanunlarda təsbit olunmuş, həm də təsbit olunmamış vətəndaşlardan gələn fikirləri ümumiləşdirib cəmiyyətin dolğun idarəçilik ilə bağlı məsələləri həll edək." — deyə prezidentin köməkçisi bildirib.
Ə.Həsənov qeyd edib ki, məhkəmə hakimiyyəti müvafiq olaraq vətəndaşları məhkəməyə azad müraciət etmək hüququnu dolğun təmin etməlidir: "KİV-lərin öz hüquqları var. Biz hər şeyi görmürük, lakin görməyə çalışırıq. Müvafiq olaraq dövlət strukturları və cəmiyyətdə daxil olan siqnalları yoxlayıb ümumiləşdiririk. Cəmiyyətin ümumiləşmiş ehtiyaclarını təmin etmək üçün təşəbbüslər irəli sürürük. Əsas odur ki, hakimiyyətin iradəsi ortadadır".
