BAKI, 20 may — Sputnik. "Bu dövrdə internet klub açıb, ordan pul gözləyənlərin ağlı yoxdur". Bunu Sputnik-in əməkdaşı ilə söhbətində Heydər Mirzəyev deyib.
H. Mirzəyev 10 ilə yaxındır ki, "Elmlər Akademiyası" metrostansiyasının çıxışında, 5 mərtəbəli binanın zirzəmisində internet klub işlədir. Təzə-təzə çox yaxşı pul qazandıqlarını deyən klub administratoru, indi içəri müştəri girəndə sevindiklərini söyləyib.
"Vaxt var idi 24 saat bu klubda müştərilər əlindən tərpənmək olmurdu. Təxminən 6-7 il əvvəlin söhbətini edirəm. Əsasən də xarici tələbələr daha çox gəlirdi. Hələ bəziləri gecə səhərə qədər stolda mürgüləyirdilər. Qazancımız yaxşı idi. O dövrlə indiki dövrü müqayisə edəndə, demək olar ki, işə havayı gəlib-gedirik", — həmsöhbətimiz deyib.
Mirzəyev bu ticarət növündə zəifləməni belə izah edib: "Əslində bugünkü vəziyyət gözlənilən idi. Bir şey ki (İnterneti nəzərdə tutur — red.), artıq insanların ciblərinə girib, onda nəyə lazımdır gəlib zirzəmilərə girmək? Elə telefonlar ixtira ediblər ki, sürəti kompüterin sürətindən qat-qat güclüdür. Ona görə də bu işə həvəslənənlərə məsləhət görürəm ki, əbəs yerə pullarını xərcləyib internet klub açmasınlar. Çünki bu işdə artıq pul yoxdur".
Yan-yörədəki digər klublarda da eyni vəziyyət hökm sürür. Misal üçün, BDU-ya gedən yolun sağ tərəfində yerləşən "Zamin" internet klubda cəmi 1 müştəri əyləşmişdi.
Sözün qısası, H.Mirzəyevin də dediyi kimi, bu zamanda internet klub açıb çörək pulu qazanmaq elə də məsləhətli deyil. Çünki bu gün kimsə, cibində gəzdirdiyi interneti görməzdən gəlib zirzəmilərə girmək istəmir və istəməyəcək.
