Rahim Zakiroğlu, Sputnik Azərbaycan
BAKI, 23 may — Sputnik. Tələbə Qəbulu üzrə Dövlət Komissiyası 22 may tarixində 2016-2017-ci tədris ili üçün Azərbaycan Respublikasının təhsil müəssisələrinə qəbul olmaq istəyən əvvəlki illərin məzunları üçün I və IV ixtisas qrupları üzrə qəbul imtahanı keçirib. Sputnik xəbər verir ki, imtahan Respublikanın Lənkəranla yanaşı, 10 şəhərində — Bakı, Naxçıvan, Gəncə, Sumqayıt, Mingəçevir, Şəki, Ağcabədi, Göyçay və Xaçmazda, ümumilikdə 24 binada keçirilib. İmtahanın işıqlandırılması üçün 50-dək KİV nümayəndəsi TQDK-da akkreditasiyadan keçib.
Məlumat üçün bildirək ki, Lənkəranda imtahan 4 saylı Humanitar Təmayüllü Məktəb-Liseydə keçirilib. İmtahanda 680 nəfər abituriyent iştirak edib. Abituriyentlərin 513 nəfəri oğlan, 167 nəfəri isə qızdır. Bundan başqa, 33 nəfər üzürlü səbəbdən imtahanda iştirak etməyib. İmtahanda 64 nəzarətçi və 5 imtahan rəhbəri iştirak edib. Lənkəranda keçirilən imtahanda Lənkəranla yanaşı Masallı, Yardımlı, Lerik və Astara rayonlarından olan abituriyentlər də iştirak ediblər.
