Şahpəri Abbasova, Sputnik Azərbaycan
BAKI, 4 may — Sputnik. Son iki gündə ölkənin şimal-qərb bölgəsində hökm sürən qeyri-sabit hava şəraiti Qax rayonunda taxıl zəmilərinə ciddi ziyan vurub. Yerli fermer Həmzət Abbasovun Sputnik-in bölgə müxbirinə verdiyi məlumata görə, güclü ildırımla müşahidə olunan leysan yağışlar nəticəsində taxıl zəmiləri tamamilə yararsız vəziyyətə düşüb.
Mövcud vəziyyət daha çox Qaxın Zəyəm, Qarabaldır, Şotavar və Ağyazayı kəndlərinə ziyan vurub. Belə ki, on hektarlarla taxıl sahəsi leysan yağışlardan əmələ gəlmiş sel sularının altında qalıb.
Qeyd edək ki, hazırda da leysan xarakterli yağışlar və küləkli hava şəraiti davam edir. Bu da taxıl zəmilərinin yatmış vəziyyətə düşməsinə gətirib çıxarır. Habelə, tozlanma və sütül-mum yetişmə dövründə olan taxıl zəmisinin gələcək məhsuldarlığına mənfi təsir göstərir.
Qeyd edək ki, analoji hadisəyə sözügedən bölgədə tez-tez rast gəlinir.
