BAKI, 30 apr – Sputnik. Yaradıcılığın bütün növləri istedad tələb edir və bu istedad doğuluşdan insanlara ilahi varlıq tərəfindən bəxş edilir. Sadəcə insanlar o istedadını tədricən inkişaf etdirməli və peşəkara çevrilməlidirlər.
Hərdən yaradıcılıqla məşğul olan bəzi adamlara həvəskar da deyirik, amma onun ortaya çıxardığı əsərləri gördükdə heç də onları hansısa qeyri-peşəkarın əl işi hesab etçək olmaz.
Rövşən Şirinov da belələrindəndir.
O, Qax rayonun Ləkit kəndində dünyaya göz açıb. Hələ uşaqlıqdan bu sənətə marağı olsa da, valideyinləri ona bu sənətlə məşğul olmağa icazə verməyiblər.
“Hər hansı bir rəssamın əl işəlini görəndə çox heyranlıqla baxardım. Məşhur rəssamların əl işlərini yatdığım yastığın altına qoyardım, baxmaqla doymazdım. Əlimə fürsət düşən kimi karandaşlarımı götürüb şəkil çəkərdim. Atam məni həmişə buna görə danlayardı. Həmişə deyərdi ki, get özünə sənət tap”, deyə rəssam bildirir.
Adətən əyalət insanı Bakıya ayaq çatan kimi getdiyi yer bulvar olar. Lakin onun hələ kiçik yaşlarından paytaxtda ilk getdiyi yer İncəsənət muzeyi olub: “Qapının ağzında saatlarla gözləyərdim ki, muzeyin qapıları açılsın. Axşam qayıdanda da muzeyə baş çəkib sonra qayıdardım rayonumuza. Ən çox Ayvazovski və İvan Şişkindən qidalanmışam. Onlardan öyrənmişəm.
Allah insanları yaradanda min nəfər insanın sevən ürəyini və yaradıcı beynini rəssamlara verir. Təbii ki, bu təkcə rəssamlara yox, həm də bütün incəsənətlə məşğul olan insanlara şamil olunur”.
Rəssam onu da qeyd etdi ki, onun üçün qara rəng yoxdur: “Qara rəngdən istifadə edirəmsə, bu tam qara rəng olmur. Qırmızı, yaşıl və göy rəngi qarışdırıb ondan qara rəng alıram.
Həyatımızda elə insanlar var ki, yüz faizlik pozitivin içində bir faiz neqativ varsa, istəyirlər ki, həmin neqativi qabartsınlar. Onsuzda həyatımızda problemlər, gündəlik qayğılar çoxdur. Mən həmişə çalışıram ki, mənim əsərimə baxan tamaşaçı qismən də olsa problemlərdən uzaqlaşsın. Qara rəngə münasibətim buradan qaynaqlanır”.
Deyirlər insan istədiyi bütün məqamlara çata bilmək qabiliyyətinə malik bir varlıqdır. Elə qəhrəmanımız da bütün qadağalara baxmayaraq əlinə fırça almaq, şəkillər çəkmək, fantaziyasını kətan üzərinə köçürmək arzusuna nail olub.
