BAKI, 23 aprel-Sputnik. İranın neft naziri Bijən Namdar Zəngənə bildirib ki, Doha görüşü neft hasilatı, neftin qiymətlərinin tənzimlənməsi və digər məsələlər baxımdan məhsuldar olmayıb. Lakin İran görüşü OPEC-ə üzv olan və olmayan ölkələr arasında danışıqların başlanması baxımından müsbət addım kimi qiymətləndirir.
Sputnik-in məlumatına görə, Tehranda Cənubi Afrikanın enerji naziri ilə görüşdən sonra keçirilən brifinqdə Bijən Namdar Zəngənə deyib ki, Doha görüşü OPEC-in əsas neft hasilatçılarına vəziyyəti dəyişmək üçün hansısa işlərin görülməli olduğunu xatırladıb.
"Biz İran İslam Respublikası olaraq, neft bazarında sabitliyin bərqərar olması üçün ortaya qoyulan istənilən planı dəstəkləməyə hazırıq" — deyən iranlı nazir beynəlxalq sanksiyaların aradan qaldırılmasından sonra İranın gündəlik neft hasilatının 1 mln. barelədək artdığını bildirib.
Zəngənə qeyd edib ki, İran ötən dövr ərzində neft bazarda itirdiyi mövqeyini bərpa edənə qədər neft hasilatını artırmaqda davam edəcək.
Aprelin 17-də Qətərin paytaxtı Dohada OPEC üzvü olan və olmayan ölkələr arasında neft hasilatının yanvar ayı səviyyəsində dondurulması ilə bağlı görüş keçirilib.
6 saatlıq görüşdə neft hasilatının "dondurulması" ilə bağlı hər hansı razılığa gəlmək mümkün olmayıb.
