Gördüyünüz bu fotolar Zaqatala rayonunun Əliabad kəndində yerləşən həftəlik bazarda lentə alınıb. Qeyd edək ki, ölkənin müxtəlif bölgələrində fəaliyyət göstərən həftəlik bazarların tarixi çox qədimdir.
Tarixçi Məcid Mehrani Sputnik-in bölgə müxbiri ilə söhbətində bildirib ki, həftəlik bazarlar hələ ta qədimdən Azərbaycanda qədim dövlətlərin yarandığı dövrdən mövcud olub. Onun sözlərinə görə, Azərbaycanın bəzi bölgələrində təşkil olunmuş bu bazarlar, adından göründüyü kimi, həftədə bir dəfə təşkil olunurdu.
"Hazırda isə təkcə Əliabad kəndində bu bazar qorunub saxlanılır. Bazarda yerli əhali və qonşu rayonlardan gələn insanlar özlərinin istehsal etdiyi məhsulları burada satırlar. Burada hər şey tapmaq olar, yeyinti məhsullardan tutmuş qədim əşyalaradək", —deyə tarixçi bildirib.
M. Mehrani əlavə edib ki, zaman keçdikcə, ələlxüsus Sovet dönəmindən sonra bazar məfhumu öz ifadə formasını dəyişib: "Lakin bu gün özünün köhnə nümunəsini qoruyub saxlayan Əliabad bazarı min illərin xatirəsini özündə yaşatmaqdadır. Və biz həmin bazara baxmaqla min il əvvəl bazarların necə olduğunu təsəvvür edə bilərik".
