BAKI, 4 apr — Sputnik. Bu gün UNEC-də (Azərbaycan Dövlət İqtisad Universiteti) Azərbaycan əsgərinə dəstək aksiyası keçirilib. UNEC-in Marketinq və Kommunikasiya Departamenti, İctimaiyyətlə Əlaqələr Şöbəsindən Sputnik-ə verilən xəbərə görə, aksiyada aprelin 1-dən 2-nə keçən gecədən başlayaraq Ermənistanın Azərbaycana qarşı növbəti silahlı təxribatı nəticəsində həlak olan hərbçi və mülki şəxslərin ruhu bir dəqiqəlik sükutla yad edilib.
Tələbələr hər an Azərbaycan əsgərinin yanında olduqlarını, Ali Baş Komandan əmr verərsə, hər birinin ön cəbhəyə gedib doğma torpaqlarımızı azad edənədək vuruşmağa hazır olduqlarını bildiriblər. Aksiyada tələbələr Azərbaycan dövlət himnini oxuyub, "Liderə inanaq, Qarabağa qayıdaq", "Şəhidlər ölməz, Vətən bölünməz", "Qarabağ bizimdir, bizim olacaq", "Azərbaycan əsgəri, keç səngərdən irəli" şüarları səsləndiriblər.
Eyni zamanda, bu gün Azərbaycan Dövlət İqtisad Universitetinin bütün tədris binalarında dərslər Azərbaycan Silahlı Qüvvələrinin cəbhə xəttində düşmənlə döyüşlərdə şəhid olan hərbi qulluqçuların xatirəsinin bir dəqiqəlik sükutla yad edilməsi və dövlət himni ilə başlayıb.
