BAKI, 1 aprel-Sputnik. Bu gün Bakı Ağır Cinayətlər Məhkəməsində hədə yolu ilə pul tələb etməkdə təqsirləndirilən şair Saday Şəkərlinin cinayət işi üzrə məhkəmə prosesi keçirilib.
Sputnik Trend-ə istinadla xəbər verir ki, hakim Əfqan Hacıyevin sədrliyi ilə keçirilən prosesdə ittiham aktı elan edilib.
Sonra sərbəst ifadə verən S.Şəkərli özünü təqsirli bilmədiyini deyib. O bildirib ki, ittiham aktının mahiyyəti yoxdur. İttiham aktında qeyd edilənlərlə razılaşmayan şair kiməsə zəng edərək hədə-qorxu gəlmədiyini deyib: "Vergilər naziri Fazil Məmmədovla 20 illik yaxın münasibətim olub. Nazir həmişə mənim şeirimə hörmətlə yanaşıb. Dəfələrlə Vergilər Nazirliyində nazirin qəbulunda olmuşam. Həmişə çap olunan kitablarımın ilk nüsxəsini nazir Fazil Məmmədova təqdim etmişəm. Sonuncu çap olunan kitabımı 2015-ci ilin 23 dekabr tarixində yenə nazirə təqdim edib getmişəm. Bundan sonra Vergilər Nazirliyinin əməkdaşı məni nazirliyə dəvət etdi. Əvvəl bütün sənədlərimi əlimdən aldılar. Sonra nazirliyin əməkdaşı Asif Cahangirovla 4 dəqiqə söhbətim oldu. O mənə 10 min manat pul təklif etsə də, onu qəbul etmədim. Asif Cahangirov zorla pulu mənə verdi. Bu zaman korrupsiya idarəsinin əməkdaşları otağa daxil oldu. Onlar mənə dedilər ki, sən hədə-qorxu ilə Vergilər Nazirliyindən pul tələb etmisən".
Məhkəmənin növbəti iclası aprelin 6-na təyin edilib.
Qeyd edək ki, 2015-ci il dekabrın 24-də Baş Prokurorluğun mətbuat xidmətinin yaydığı məlumata görə, Bakı şəhər sakini Saday Şəkərovun (Saday Şəkərli) külli miqdarda əmlak əldə etmək məqsədilə Vergilər Nazirliyinin vəzifəli şəxsi haqqında kütləvi informasiya vasitələrində ifşaedici, onu nüfuzdan salan, uydurma yazılar yazmaqla, barəsində rüsvayedici məlumatlar yayma hədəsi ilə tələb etdiyi 10 min manat məbləğində pulu almasında şübhələr üçün əsaslar olduğundan faktla bağlı Cinayət Məcəlləsinin 182.3.2-ci (külli miqdarda əmlakı hədə-qorxu ilə tələb etmə) maddəsi ilə cinayət işi başlanıb. S.Şəkərli iş üzrə təqsirləndirilən şəxs qismində cəlb edilərək, ona Cinayət Məcəlləsinin qeyd edilən maddəsində nəzərdə tutulan ittiham elan edilməklə, məhkəmənin qərarı ilə barəsində həbs qətimkan tədbiri seçilib.
