Hikmət Orhun, Sputnik Azərbaycan
BAKI, 31 mart — Sputnik. Qazax rayonu, Bakı küçəsinin sakinləri, məhəllədən keçən Poylu arxının antisanitar şərait yaratdığından şikayətçidirlər. Sputnik-ə müraciət edən şikayətçilər, sovet dövründə vaxtlı-vaxtında təmizlənən arxın hazırda nəzarətsiz qaldığını və bu problemin onların səhhətinə təhlükə olduğunu deyiblər.
Ötən əsrin ortalarında çəkilən arx üzüm bağlarının suvarılması məqsədilə istifadə olunub. Vaxtilə qab-qacaq və paltar yuyulan arx müstəqillik dövründə tamamilə baxımsız qalıb, axıdılan tullantılar müxtəlif xəstəliklərə yol açıb.
Məhəllə sakini Elmar Rzalı bildirib ki, kanalizasiya xətləri arxa yönəldilib: "Müstəqillik dövründən bu yana arxa kanalizasiya xətləri, xəstəxanaların, bəzi binaların və fərdi yaşayış evlərinin zir-zibili axıdılıb. Qabaqlar ildə bir dəfə gəlib təmizləyirdilər, sonra tamamilə yaddan çıxarıldı".
Məhəllə sakini onu da deyib ki, arx tamamilə xəstəlik mənbəyidir: "1999-cu ildən başlayaraq, 4-5 il malyariya xəstəliyi epidemiya kimi yayılmışdı. Arxın keçdiyi ərazilərdə az qala hamı yoluxmuşdu. Bizim məhəllədə minimum hərə 4-5 dəfə bu xəstəliyə tutulub".
O, qeyd edib ki, yaranmış problemə yaxın vaxtlarda əlaqədar orqanlardan nəzarət olmasa, ötən illərdə mövcud olan xəstəliklər yenidən baş qaldıracaq. Məsələylə bağlı Qazax "Su-Kanal" idarəsi ilə əlaqə yaratmağa çalışsaq da, cəhdimiz boşa çıxdı.
