Məsələ ilə bağlı Sputnik-in bölgə müxbiri daşınmaz əmlakın alqı-satqısı üzrə 2 mütəxəssisə müraciət edib. Lənkəran şəhərinin 2-ci mikrorayon ərazisində fəaliyyət göstərən Nurəddin Fərzullayevin bildirdiyinə görə, 2-ci devalivasiyadan sonra mənzil alqı-satqısında tam durğunluq yaşanır və qiymətlərdə azalma var:
"Son 3 ay ərzində demək olar, mənzil alan yoxdur. Qiymətlərə gəldikdə, 1 otaqlı mənzillər 15- 20 min manat, 2 otaqlı 25-30 min manat, 3 otaqlı mənzillər 35-40 min manat, 4 və ya 5 otaqlı mənzillər isə 40-45 min manat arasında dəyişir".
"Bu da yəni mənzillərin şəraitindən, təmirindən asılıdır. Alıcı qüvvəsi keçən illə müqayisədə xeyli azalıb", —deyə ekspert bildirdi.
Müsahibimiz mənzil kirayəsində də azalma olduğunu deyir: "Əvvəllər mənzil kirayəsinə tələbət çox idi, amma bu il elə deyil. 2 otaqlı mənzillər 100-120 manat, 3 otaqlılar isə 150-200 manat civarında dəyişir. Burada da təbii ki, qiymətlər mənzillərin şəraitindən asılı olaraq dəyişir".
Lənkəranın həyət evləri və şəhərə yaxın kəndlərdə — Sütəmurdov, Digah, Şilavar və Girdəni ərazilərində torpaq sahələrini satışında vəziyyəti öyrənmək üçün isə digər bir əmlak mütəxəssisinə müraciət etdik. Şakir Şükürov bildirdi ki, həyət evlərinin satışı ümumiyyətlə dayanıb: "3 aydır heç bir ev sata bilmirəm. Durum çox ağırlaşıb. Gələn-gedən yoxdur".
"Evlərin qiymətləri şəhərdə yerləşməsində asılıdır. Şəhərətrafı yerlərdə həyət evləri 40-100 min manat civarında, mərkəz hissələrdə isə 150-300 min manat civarında dəyişir", —deyə ekspert bildirdi.
Onun sözlərinə görə, şəhər ərazisində 1 sot torpaq 5-10 min manat, Şilavar, Digah, Sütəmurdov və şəhərə daha yaxın olan digər kəndlərdə isə 1 sot torpaq sahəsi 1000-1500 manata satılır. Hər iki mütəxəssis Daşınmaz əmlak bazarındakı durğunluğu devalvasiya ilə əlaqələndirir.
