BAKI, 4 mart — Sputnik. Bu gün Bakıda ağır yol-nəqliyyat hadisəsi baş verib. Aeroport yolunda 160 saylı marşrut avtobusla "VAZ 2109" markalı avtomobil və daha bir neçə maşın toqquşub.
Səhiyyə Nazirliyinin mətbuat xidmətinin rəhbəri Liya Bayramova Sputnik-ə bildirib ki, ilkin məlumata əsasən, hadisə nəticəsində 14 nəfər xəsarət alıb, ölüm qeydə alınmayıb. 8 nəfər Sabunçu rayon 3 saylı Şəhər Klinik Xəstəxanaya aparılıb. Onlardan 3-nün vəziyyəti ağırdır. 6 nəfər isə özləri evə getdikdən sonra həkimə müraciət edib.
Hazırda polis əməkdaşları hadisə yerində araşdırma aparırlar.
