BAKI, 8 fev — Sputnik. Özbəkistandakı Azərbaycan Səfirliyinin nəzdindəki Heydər Əliyev adına Azərbaycan Mədəniyyət Mərkəzində Qarabağ geyimlərinin daimi sərgisinin açılışı olub.
Mədəniyyət və turizm nazirliyinin mətbuat xidmətindən Sputnik-ə verilən məlumata görə, Mədəniyyət Mərkəzinin foyesində yaradılan və daimi sərgidə nümayiş etdiriləcək libasları Bakıdakı Milli Geyim Evi tərəfindən hazırlayıb.
Sərgidə Qarabağ geyimlərinin olduqca maraqlı kompozisiyası yaradılıb. Şüşə vitrinlərdə sərgilənən geyimlər, görünüşün keyfiyyətini yüksəltmək məqsədi ilə xüsusi işıqlandırma aparatları ilə təmin olunublar.
Geyimlərə Qarabağın XVII-XIX əsrlərə aid bir sıra mərasim, toy libasları, şənlik geyimləri, Qarabağın zadəgan xanımlarının geyimləri, qadın və kişi libasları daxil edilib. Kolleksiyada olan libaslar əsasən ipəkdən hazırlanmış və xüsusi daş-qaşlarla bəzədilib.
Sərginin açılışı edən Özbəkistandakı Heydər Əliyev adına Azərbaycan Mədəniyyət Mərkəzinin direktoru Samir Abbasov Azərbaycan mədəniyyətinə dair təbliğat işin daha da gücləndirmək və effektiv həyata keçirmək üçün Azərbaycanın Qarabağ geyimlərinin, xalçalarının, mətbəxinin Özbəkistanda mütəmadi olaraq nümayişinin həyata keçirildiyini qeyd etdi. Mədəniyyət Mərkəzi tərəfindən 2015-ci ildə "Könlüm keçir Qarabağdan" adlı sərgidə Qarabağ xalçaları, mətbəxi sərgilənmiş, ötən ilin dekabr ayında isə "Azərbaycan-Özbək milli geyimlərinin nümayişi" adlı moda sərgisində Qarabağa aid geyimlər nümayiş etdirilib. O, qeyd olunan sərgilərin Daşkənddə böyük rezonans doğurduğunu, ictimaiyyət tərəfindən maraqla qarşılandığını və yerli mətbuatda geniş işıqlandırıldığını söyləyib.
Samir Abbasov Azərbaycanın müxtəlif regionlarının özünəxas geyimləri ilə seçildiyini bildirmiş, milli geyimlərimizin dünyada tanıdılması və təbliği ilə əlaqədar Heydər Əliyev Fondunun layihələri barədə məlumat verib.
Tədbirdə çıxış edən özbək yazıçı Şəhla Qasımova Azərbaycanın Qarabağ geyimlərinin diqqətəlayiq və öz rəngarəngliyi ilə seçildiyini, bu diyarda yaşayıb yaratmış azərbaycanlıların tarixinin, mədəniyyətinin necə zəngin olduğunu sübut etdiyni deyib.
Mədəniyyət Mərkəzinin nəzdindəki "Azərbaycan qızları" rəqs ansamblı Qarabağ rəqslərini ifa ediblər.
Daha sonra Mədəniyyət Mərkəzinin nəzdindəki kurs və dərnəklərin şagirdləri sərgi barədə, Azərbaycanın Qarabağ bölgəsi, bu diyarın mədəniyyəti, geyimləri haqqında məlumatlandırılıblar.
Qeyd edək ki, daimi sərgi Mədəniyyət Mərkəzində keçirilən tədbirlər zamanı mötəbər qonaqların, Mərkəzə daim gələn yerli ictimaiyyətin, azərbaycanlıların, habelə Mərkəzdə fəaliyyət göstərən dərnək və kursların tələbələrinə Azərbaycanın Qarabağ diyarının tarixi, mədəniyyəti, milli geyimləri ilə tanış olmağa imkan verəcək.
Mədəniyyət Mərkəzindən verilən məlumata görə yaxın günlərdə Özbəkistanda fəaliyyət göstərən səfirlərin, diplomatların xanımları Qarabağ geyimlərinin sərgisi ilə tanışlığı nəzərdə tutulub.
