BAKI, 3 fev-Sputnik. Bu gün Avropa İttifaqı miqrasiya böhranı ilə əlaqədar Türkiyəyə 1 milyard avro maliyyə yardımını təsdiqləyib.
Sputnik-in məlumatına görə, bu barədə Reuters agentliyi xəbər yayıb.
Avropa Komissiyasından verilən xəbərdə bildirilir ki, İttifaqın 28 üzvünün hamısı, o cümlədən də daha əvvəl Türkiyəyə zəruri vəsaitlərin ayrılmasını blok edən İtaliya yardımla bağlı qərara səs verib.
Niderlandı Ai-də təmsil edən xarici işlər naziri Bert Kunders bildirib ki, Aİ ölkələri Türkiyədəki qaçqınlara yardım fonduna maliyyə yardımı vəsaitlərinin üçdə ikisinin daxil olmasını təmin etməyə razılıq verib.
Daha əvvəl Almaniyanın federal-kansleri Angela Merkel və xarici işlər naziri Frank-Valter Ştaynmayer bəyan ediblər ki, Avropadakı miqrasiya böhranının aradan qaldırılmasında Türkiyə başlıca rol oynayır.
Yanvarın 30-da Almaniyanın "Welt" qəzeti Türkiyənin miqrasiya böhranı ilə əlaqədar Avropa İttifaqından 5 milyard avro alacağını yazmışdı. Əvvəl bu məbləğin 3 milyard olacağı bildirilirdi.
1 milyard avro Aİ fondlarından, daha 2 milyard isə quruma üzv olan ölkələr öz büdcələrindən ayırmalı idilər.
Bu barədə qərar ötən ilin noyabrında Brüsseldə keçirilən Avropa İttifaqı — Türkiyə ikitərəfli sammitində verilmişdi.
