Bakı, 29 yan — Sputnik. Azərbaycanda daha bir bankın lisenziyası ləğv olunduğu deyilir. Sputnik, "Qafqazinfo"ya istinadən xəbər verir ki, Mərkəzi Bankın ötən gün keçirilən iclasında “Texnika Bank”ın lisenziyasının ləğv olunması ilə bağlı qərar qəbul edilib və gün ərzində AMB-nin rəsmi qərarı açıqlanacaq.
“Texnika Bank” Müşahidə Şurasının sədri Etibar Əliyev “Qafqazinfo”ya açıqlamasında bildirib ki, dövlət orqanlarının qərarı nə olacaqsa, ona hörmətlə yanaşacağıq:
“Bir müddət əvvəl bankın dirçəldilməsi ilə bağlı qərara necə hörmətlə yanaşmışdıqsa, bu dəfə elə olacaq. Amma bankın lisenziyasının ləğv edilməsi barədə məlumatım yoxdur. Rəsmi qurumun qərarını gözləmək lazımdır”
Ötən ilin dekabrın 21-dən manatın üzən məzənnəyə keçməsi bankların işinə mənfi təsir göstərib, bu vaxta kimi bir sıra bankların fəaliyyəti dayanıb, bəziləri isə birləşmək qərarı veriblər.
