BAKI, 23 yan-Sputnik. ATƏT-in Minsk qrupu həmsədrlərinin Avropa Şurası Parlament Assambleyasında müzakirəyə çıxarılacaq "Dağlıq Qarabağ və Azərbaycanın ətraf rayonlarında zorakılıq hallarının artması" və "Azərbaycanın sərhədyanı rayonlarının sakinlərinin qəsdlə içməli sudan məhrum edilməsi" adlı hesabatlarla bağlı qəbul etdikləri bəyanat Azərbaycanda fəaliyyət göstərən vətəndaş cəmiyyətinin nümayəndələrinin də kəskin etirazına səbəb olub.
Bununla bağlı Sputnik-ə açıqlama verən QHT sədri Niyaməddin Orduxanlı bildirib ki, ATƏT-in Minsk qrupu artıq çəkinmədən Ermənistanın açıq müdafiəçisi olduğunu bəyan edir: "Azərbaycan cəmiyyətinin bu quruma inamı yoxdur. Hamı bilir ki, Minsk qrupu birbaşa yaranmış münaqişənin həll olunmamasının və status-kvonun qorunub saxlanılmasının əsas səbəbkarları rolunu oynayır. Faktın özü bir daha sübut etdi ki, bu bəyanatla ATƏT-in Minsk qrupu həmsədrləri beynəlxalq hüquqın əleyhinə olaraq Dağlıq Qarabağ münaqişəsinin tənzimlənməsi ilə bağlı birtərəfli mövqelərini ortaya qoydular. Bu səbəbdən də onların vasitəçilik missiyalarını davam etdirməyə mənəvi və hüquqi haqları qalmır. Bu bəyanatdan dərhal sonra Azərbaycan bu qurumdan imtina etməlidir!"
QHT sədrinin fikrincə, Azərbaycan cəmiyyəti baş vermiş hadisəyə özünün sərt reaksiyasını bildirməlidir: "Bu məsələdə hər kəs, o cümlədən vətəndaş cəmiyyətinin nümayəndələri etırazını bildirməlidirlər. Biz bunu sükutla qarşılaya bilmərik. Azərbaycan xalqı öz etirazını bildirməlidir. Azərbaycan rəsmiləri də buna seyrçi qalmamalı, ATƏT-in və bu qurum tərəfindən formalaşdırılan Minsk qrupunun fövqəladə toplantısının çağırılmasına nail olmalı, Rusiya, ABŞ və Fransa üçlüyünün vasitəçilik missiyasından imtina etməlidir. ATƏT-in Minsk qrupu hazıkı tərkibi nə vaxtsa Dağlıq Qarabağ münaqişəsinin ədalətli həll ediləcəyinə və bu istiqamətdə fəaliyyət göstərəcəyinə ümid yaratmır."
