BAKI, 22 yan — Sputnik. Respublikanın daxili işlər orqanları tərəfindən əhalinin ərzaq təhlükəsizliyini təmin etmək məqsədi ilə keyfiyyətsiz, insan orqanizminə ciddi zərər vuran, istifadəyə yararsız yeyinti və sənaye məhsullarının müəyyən edilərək satışının qarşısının alınması sahəsində növbəti uğurlu əməliyyat tədbiri həyata keçirilib. Bu barədə Sputnik-ə Daxili İşlər Nazirliyinin mətbuat xidmətindən bildirilib.
Belə ki, Baş Mütəşəkkil Cinayətkarlıqla Mübarizə İdarəsinə daxil olmuş məlumat əsasında Baş İdarə əməkdaşlarının həyata keçirdikləri əməliyyat-axtarış tədbirləri nəticəsində Füzuli rayon sakini Səlim Əbdürrəhimovun Abşeron rayonunun Ceyranbatan qəsəbəsindəki bağ massivində qurduğu gizli sexə baxış zamanı külli miqdarda saxta "Zolotoe Koltso", "Flaqman", "Krepost", "Qladius", "Banketnaya", "Maqnat" araqları, "Jack Daniels" və "Chivas" viskiləri, 300 litr keyfiyyətsiz spirt, 5000 ədəd saxta aksiz markaları və spirtli içkilərin hazırlanması üçün istifadə olunan xüsusi avadanlıqlar aşkar olunaraq götürülüb.
Araşdırmalarla S.Əbdürrəhimovun Laçın rayon sakinləri Rəşad Təhməzov, onun qardaşı Ramil Təhməzov və Abşeron rayon sakini Məzahir Əbdürrəhmanovla birlikdə saxta spirtli içkilər istehsal etmələri müəyyən edilib.
Həmin spirtli içkilər Ədliyyə Nazirliyinin Məhkəmə Ekspertizası Mərkəzinə göndərilib və onların keyfiyyətsiz, insan orqanizminə ciddi təhlükə yaradan və istifadəyə yararsız olması məlum olub.
Faktla bağlı toplanmış material prosessual qərar qəbul edilməsi üçün Baş İdarənin İstintaq Şöbəsinə göndərilib.
Araşdırma aparılır.
Səlim Əbdürrəhimov isə saxta içki istehsalı barədə deyib: "Kafelərdən şüşələri yığıb gətirirdim evə. Qonşularıma başa salmışdım, necə hazırlamağı öyrətmişdim. Mən də axşamüstü düşürdüm kafeyə, dükana satırdım. Bazar qiymətindən aşağı verirdim. Aparıb rayonlarda da satmaq istəyirdim".
