Bakıda ictimai nəqliyyat sisteminin modernləşdirilməsi davam edir. Belə ki, artıq çoxdan gözlənilən nəqliyyatın intellektual idarəetmə sistemi tətbiq olunub. Dayanacaqlarda olan paytaxt sakinlərinə avtobusların gəlmə vaxtı barədə məlumat verilir. Bundan əlavə, ölkədə vahid gediş kartları tətbiq olunub. Bu isə birmənalı olaraq xidmət səviyyəsini və gediş haqqı ödənilməsinə nəzarətin keyfiyyətini artırır.
Bu il paytaxtın ictimai nəqliyyat sistemini daha çox dəyişikliklər gözləyir. Bu barədə Sputnik-ə müsahibəsində Nəqliyyatı İntellektual İdarəetmə Mərkəzinin İctimaiyyətlə əlaqələr üzrə meneceri Şəfa Mehmanqızı deyib.
"Belə ki, ötən il NİİM Nəqliyyat nazirliyinin müxtəlif qurumlarına təxminən 70 təklif göndərib. Onlardan 30-u artıq yerinə yetirilib, qalanları isə icra olunma mərhələsindədir. Çoxsaylı dəyişikliklər olub. Əsas dəyişiklik şəhər ictimai nəqliyyatı marşrutları ilə baş verdi.
"Baku Bus" şirkəti işə başladı və xəttə 14 marşrut buraxıldı. Bu il həmin istiqamətdə işlər davam edəcək",- deyə Mehmanqızı əlavə edib.
Yeri gəlmişkən, Mərkəz bəzi müvafiq strukturları onların təkliflərini yerinə yetirməyə məcbur edib. Bu isə nəqliyyat vasitələrinin sərbəst hərəkəti üçün imkan yaratdı. NİİM hazırda Dövlət Yol polisininin əməkdaşları ilə birgə yollarda tıxacların ləğv olunması üzrə işi davam etdirir.
NİİM menecerinin sözlərinə görə, "BAKI 2015" Birinci Avropa Oyunları zamanı sınaqdan çıxarılmış praktika təkmilləşdiriləcək və bu ilin iyununda keçiriləcək Formula-1 yarışları zamanı tətbiq olunacaq.
