"Cibimdə 5 manat var, onu da siqaretə vermək istəmirəm..."

BAKI, 8 yan — Sputnik. Xəbər verdiyimiz kimi, bu gün ölkədə tütün məhsullarının qiymətləri yenidən qalxıb. Sputnik-in əməkdaşı bu bahalaşmaya, siqaret çəkən bəzi tanınmış insanların münasibətini öyrənib.

Mahir Mammadli — junalist: "Siqaretin, yaxud başqa məhsulun bahalaşmasına münasibət təbii ki, mənfidir. Birdən-birə aylıq büdcəmizdə siqaret büdcəsi azı 70-80 manat artıb son 20 gündə. Nəzərə alsaq ki, siqaret aludəçiliyi də bir növ xəstəlikdir, o zaman onu çəkməkdən imtina o qədər də asan deyil. Amma, təbii ki, siqaretə pul çatdıra bilməsək, məcburən imtina etməli olacağıq. Siqareti atılması prosesini hamı eyni cür yaşamır. Odur ki, ətrafımızdakılara səbr arzulayıram".

Rauf Alagözov — şair: "Münasibətim müsbətdir. Təklif edirəm ki, siqaret daha çox bahalaşsın və qida məhsullarının bahalaşmasının qarşısını almaq üçün siqaret və içkinin bahalaşmasından gələn pul kompensasiya edilsin".

Emil Maqalov — narkomaniya üzrə ekspert: "Siqaretin qiymət artımı onu tərgitməyə yox, daha da artırmağa təkan verdi. Bəzilərimiz siqareti psixoloji duruma görə çəkdiyimizdən, artım və krizis bunu daha da sürətləndirdi".

Faiq Balabəyli — şair: "Mən siqareti 22 yaşım olanda, 1986-ci ildən çəkmişəm. Bu uzun illər ərzində iki dəfə siqareti atmaq qərarına gəlmişəm və hər ikisində də çətinlik çəkmədən tərgitmişəm. Birinci dəfə 4 il qabaq. Təxminən ötən ilin 1-ci yarsında yenidən tərgitdim. "Siqaret, səninlə mənimki tutmaz", dedim. Bahalaşmaya qədər artıq siqaretlə mənim aramda "soyuqluq" var idi".

Sona Mamedova — tələbə: "Atam siqaret çəkir. Siqaretin bahalaşması siqareti tərgitməyə səbəb olmur. Mən siqaret çəkən birisi olsaydım, mənim də tərgitməyimə səbəb olmazdı. Nişanlım Tariyelin də tərgitməyinə səbəb olmayacağından əminəm".

Elnur Hidayətoğlu — televiziya aparıcısı: "Şəxsən mən siqareti tərgitmişəm. Düz deyirlər, siqaret psixoloji bir şeydir. Sağlamlığa ziyandır deyə, tərgitmək olmur. Amma psixoloji özünə təsir etsən ki, bu qədər bahalaşma qarşılığında gündə 5 manata yaxın siqaretə pul vermək çətindir, avtomatik siqareti tərgitmək məncə asanlaşır. Yəni, özünə psixoloji təsir etməsən, mümkün deyil. İkinci devalvasiyadan sorna tərgitmişəm. Bu isə 3-cü devalivasiyadır".

Amid İsgəndərov — jurnalist: "Siqaret çəkən insan qiymətindən aslı olmayaraq çəkəcək. Bir həftə əvvəl axşamüstü bir ucaboylu mədəni, yaşı 52-53 olan bir kişi yaxınlaşıb mənə deyir ki, "Siqaretin varsa, mənə 2-3 ədəd ver də. Maaş almamışam, cibimdə 5 manat pulum var, istəmirəm onu da siqaretə verim". Deməli pulunun olmamasına baxmayaraq, o adam yenə də siqareti kimdənsə aldı".

Zaur Xudiyev — idman jurnalisti: "Artıq tərgitdim. Dekabrın 22-dən çəkmirəm. Səbəb də böyük ölçüdə bahalaşma oldu".