BAKI, 23 dek-Sputnik. Süni bahalaşmaya yol verənlər, möhtəkirliklə məşğul olanlara qarşı cəza tədbirləri həyata keçiriləcək.
Sputnik-in məlumatına görə, Azərbaycan prezidenti İlham Əliyev Milli Olimpiya Komitəsində 2015-ci ilin yekunları, idmançılara və idman mütəxəssislərinə mükafatların təqdim edilməsi mərasimindəki çıxışında belə deyib.
O qeyd edib ki. ölkədə biznes mühitinin daha da yaxşılaşdırılması üçün lisenziyalarla bağlı ciddi qərarlar qəbul olunub. "İqtisadi-maliyyə sektorunda daha ciddi islahatlar aparılacaq. İqtisadi liberallaşma, inhisarçılığa qarşı mübarizə sahəsində tədbirlər görüləcək. Gömrük və vergi sistemində maksimum şəffaflıq təmin ediləcək" — deyə prezident bildirib.
İlham Əliyev bununla bağlı hökumət qarşısında qoyulan vəzifələrə də toxunub: "Hökumətin qarşısında makroiqtisadi sabitliyin təmin edilməsi, inflyasiyanın minimal səviyyədə olması, ölkədə istehsal olunan ərzaq və tikinti materiallarının, yanacağın qiymətinin sabit saxlanılması ilə bağlı vəzifələr qoyulub. Biz çalışacağıq ki, manatın məzənnəsi ilə bağlı qaçılmaz qərarın fəsadlarını azaldaq, minimum səviyyəyə endirək".
