BAKI, 17 dek-Sputnik. Türkiyə prezidenti Rəcəb Tayyib Ərdoğan və bu ölkənin baş naziri Əhməd Davudoğlu "Günəşli" neft yatağının 10 saylı platformasında baş vermiş yanğın nəticəsində insanların ölümü ilə bağlı Azərbaycan prezidenti İlham Əliyevə başsağlığı məktubları göndəriblər.
Sputnik Azərtac-a istinadən xəbər verir ki, Rəcəb Tayyib Ərdoğanın başsağlığı məktubunda deyilir: "Xəzər dənizindəki "Günəşli" neft yatağının 10 saylı platformasında baş vermiş yanğın nəticəsində insanların ölümü ilə bağlı xəbəri dərin məyusluq hissi ilə qarşıladım.
Millətim adından və şəxsən öz adımdan bu qəzada həyatlarını itirənlərə Allahdan rəhmət, xəsarət alanlara şəfa, Zati-alinizə, həlak olanların ailələrinə və qardaş Azərbaycan xalqına dərin hüznlə başsağlığı verirəm.
Türkiyə hər zaman olduğu kimi, bu kədərli günlərdə də Azərbaycan dövlətinin və xalqının yanındadır, ona hər cür kömək göstərməyə hazırdır.
Fürsətdən istifadə edərək, Zati-alinizə və Azərbaycan xalqına əmin-amanlıq, rifah arzu edirəm".
Türkiyənin baş naziri Əhməd Davudoğlunun Azərbaycan prezidenti İlham Əliyevə başsağlığı məktubunda isə deyilir: "Dekabrın 4-də qardaş Azərbaycana rəsmi səfərdən qayıdandan sonra Xəzər dənizinin "Günəşli" yatağındakı 10 saylı platformada yanğın nəticəsində insan ölümü ilə bağlı xəbəri dərin kədər hissi ilə qarşıladım.
Hökumətim adından və şəxsən öz adımdan qəzada həyatını itirənlərə Allahdan rəhmət, xəsarət alanlara şəfa diləyir, Zati-alinizə, həlak olan insanların ailələrinə və qardaş Azərbaycan xalqına dərin hüznlə başsağlığı verirəm".
