BAKI, 6 dek-Sputnik. Atamın vəziyyəti ağırdır. Üzü bütünlüklə yanıb. Həkimlər sadəcə səbr etməyimizi məsləhət görürlər.
Bu sözləri Sputnik-ə "Günəşli" yatağının 10-cu dərin dəniz özülündə baş vermiş faciə zamanı yanıq xəsarəti alan 53 yaşlı Bəxtiyar Ələkbərovun oğlu deyib. O, atasının hansı şəraitdə belə ağır xəsarət aldığı barədə heç bir məlumatı olmadığını deyib.
Bəxtiyar Ələkbərov "Günəşli" yatağının 10-cu dərin dəniz özülündə baş vermiş yanğın və qəza nəticəsində təxliyə olunan 31 nəfərdən biridir. O, ağır dərəcəli bədən xəsarətləri və yanıq diaqnozu ilə Mərkəzi Neftçilər Xəstəxanasının Təcili Tibbi Yardım Xidmətinə gətirilib. Daha sonra o, Respublika Yanıq Mərkəzinə göndərilib. Hazırda Yanıq Mərkəzində onun həyatının xilas edilməsi üçün müvafiq addımlar atılır.
