BAKI, 1 dek-Sputnik. Nardaranda əllərdə qanunsuz saxlanılan odlu silahların, partlayıcı maddə və qurğuların yığılması məqsədilə keçirilən əməliyyat tədbirləri ilə əlaqədar olaraq, bu gün səhər saatlarından qəsəbə və qəsəbəətrafı yollar ciddi nəzarətə götürülüb.
Sputnik Trend-ə istinadən xəbər verir ki, ötən günlərdən fərqli olaraq, bu gün səhər saatlarından etibarən hətta qəsəbə sakinlərinin qəsəbəyə girişinə icazə verilmir. Həmçinin Nardaran sakinlərinin qəsəbəni tərk etmələrinə qadağa qoyulub.
Qəsəbəətrafı yollarda isə bütün avtomobillər və sərnişinlərin sənədləri yoxlanılır. Ətraf ərazilərdən Bakı istiqamətinə hər kəs tək-tək yoxlanılmaqla buraxılır.
Nardaranın girəcəyinə ağır zirehli texnika toplanıb, əraziyə Çevik Polis Alayı əməkdaşları nəzarət edir.
Qəsəbənin küçə və meydanlarında radikal dini simvollar, şüarlar, bayraqlar yığışdırılıb.
Hazırda hüquq-mühafizə orqanlarının əməkdaşları tərəfindən evlərdə qeydiyyatı olan şəxslər siyahı üzrə yoxlanılır.
Qeyd edək ki, bu gün saat 08:00-da vətəndaşlarımızın hüquqlarının, azadlıqlarının, qanuni mənafelərinin müdafiəsi, əllərdə qanunsuz saxlanılan odlu silahların, partlayıcı maddə və qurğuların yığılması məqsədilə Nardaran qəsəbəsində xüsusi əməliyyat keçirilməsinə başlanılıb.
Müvafiq plana uyğun olaraq Daxili İşlər Nazirliyinin Daxili Qoşunlarının və nizami polis hissələrinin məhdud sayda xüsusi texnikası, şəxsi heyəti qəsəbəyə daxil olub, müəyyən edilmiş yerlərdə postlar qoyulub və hazırda xüsusi əməliyyat zonasında Baş Prokurorluğun, Daxili İşlər və Milli Təhlükəsizlik nazirliklərinin istintaq-əməliyyat qrupu fəaliyyət göstərir.
