BAKI, 11 noy — Sputnik. Oktyabr ayının əvvəlindən etibarən paytaxt Bakıdan respublikanın şimal istiqamətinə olan yeganə Bakı-Sumqayıt mağistralının Bakı Beynəlxalq avtovağzalı qarşısında “Avtovağzal” metro stansiyasına piyada keçidinin tikintisi ilə əlaqədar olaraq avtomobillərin hərəkətinə qoyulan məhdudiyyət yaxın günlərdə aradan qalxacaq.
Bunu Sputnik-ə açıqlamasında "Bakı Metropoliteni" Qapalı Səhmdar Cəmiyyətinin İctimaiyyətlə əlaqələr şöbəsinin rəhbəri Nəsimi Paşayev deyib.
Onun sözlərinə görə, piyada keçidinin tikintisi ilə əlaqədar olaraq montaj işləri on gün ərzində yekunlaşacaq və bununla da avtomobillərin hərəkətinə mane olan və bu səbədən də yaranan tıxac problem öz həllini tapacaq: “Hazırda keçidin tikintisinin qısa zamanda başa çatdırılması ilə bağlı qızğın iş gedir. Biz avtomobillərin hərəkətinə mane olan problemin tez bir zamanda aradan qaldırılması istiqamətində əlimizdən gələni edirik. Amma bizdən asılı olmayan və tikintinin gedişi ilə bağlı texniki parametrlər var ki, bu da təbii olaraq vaxt tələb edir. Ancaq ümid edirəm ki, yaxın bir həftə 10 gün ərzində orada işlər yekunlaşacaq.”
Paşayev onu da əlavə etdi ki, Biləcəri sakinlərinin "Avtovağzal" metro stansiyasına gediş-gəlişini asanlaşdırmaq Bakı-Sumqayıt şossesində piyada keçidinin tam tikintisi isə dekabrın əvvəlində başa çatacaq.
