BAKI, 6 noy-Sputnik. Ədliyyə Nazirliyi Azərbaycan Xalq Cəbhəsi Partiyası (AXCP) ətrafında yaranmış vəziyyətə münasibət bildirib.
Sputnik APA-ya istinadən xəbər verir ki, qurumun mətbuat xidməti Nazirliyə AXCP qurultayı ilə bağlı 2 müraciətin daxil olduğunu bildirib. "Bu müraciətlər araşdırılır və yaxın vaxtlarda araşdırmanın nəticəsi cəmiyyətə açıqlanacaq" — deyə mətbuat xidmətindən bildiriblər.
Əli Kərimlinin sədri olduğu AXCP sentyabrın 27-də keçirdiyi qurultayla bağlı müvafiq məlumatların dövlət reysterinə daxil edilməsi üçün Ədliyyə Nazirliyinə müraciət edib.
Əli Kərimlinin sabiq müavini olan Razi Nurullayev isə əsl AXCP-nin onun rəhbərliyi ilə yarandığını bəyan edib və partiya üzvlərini öz ətrafında birləşməyə çağırıb. O, oktyabrın 18-də bu təşkilatın qurultayını keçirib və Ədliyyə Nazirliyinə müraciət edib.
