“Şərq” qəzetinin baş redaktoru Akif Aşırlı fikrincə, ənənəvi mediadan bu seçkidə namizədlərin yararlanması işi çox zəif oldu:
“Seçki prosesində ən aktiv iştirak edən Yeni Azərbaycan Partiyası (YAP) oldu. Onun üzvlərini isə yalnız YAP-ın mediya orqanlarının imkanlarından yararlanmağı doğru qərar deyild. Ümumiyyətlə, belə yanaşma seçki prosesində mediyanın çəkisinin azalmasına səbəb oldu. Ənənəvi mediadan bu seçkidə namizədlərin yararlanması işi çox zəif idi. Müəyyən saytlarda ayrı-ayrı namizədlərin təbliğatı üçün bu imkanlar vardı və onlar yararlandılar. Seçki təbliğatı demək olar ki, sosial şəbəkələrdə aparıldı. Sosial şəbəkələri peşəkar jurnalistikanın hansısa tərkib elementi kimi görmək mümkündü ya qeyri mümkündür bu ciddi sual doguran məsələdir”.
Sosial medianın ən aparıcı media qurumlarını üstələdiyini Modern.az saytının redaktoru Elşad Eyvazlı da etiraf edir. Onun fikrincə, seçicilərlə görüşlərin dərhal “facebook”da yerləşdirilməsi əlavə tirajlanmaya ehtiyac qoymurdu. Bununla yanaşı E.Eyvazlının iradları da var:
“Son seçkilərdə namizədlər mediaya kifayət qədər diqqət yetirmədilər, yaxud da ona yer vermədilər. Artıq sosial media deyilən bir amil var ki, bu hətta ən aparıcı media qurumlarını üstələyibdir. Digər bir tərəfdən namizədlərin çoxu söyləyirdi ki, daha çox üstünlüyü seçicilərlə birbaşa görüşlərə verirlər. Artıq seçicilər ilə görüşlər anında facebook səhifəsində yer alırsa mediaya ehtiyac duyulmadığı hiss olunur. Bununla yanaşı yeni yaranan saytların kütləvi şəkldə “qara piar”a üstünlük verməsi müşahidə olundu. Bu “qara piar” yol verilməzdir”.
Xatırladaq ki, təşviqat kampaniyasında televiziyalar ümumiyytələ kənarda qaldı. Belə ki, hakim YAP pulsuz efir vaxtından imtina elədi, digər tərəfdən bir çox namizədlər ödənşli efir vaxtının baha təklif olunduğunu əsas gətirərək televiziyaların imkanlarından yararlanmadılar.
