Şahpəri Abbasova, Sputnik Azərbaycan
BAKI, 26 oktyabr — Sputnik. Bu gün Balakən rayonunda III Xurma festivalı keçirilib. Balakən Rayon İcra Hakimiyyətinin təşkilatçılığı, Kənd Təsərrüfatı və Mədəniyyət nazirliklərinin, Kənd Təsərrüfatı Nazirliyinin tabeliyindəki “Aqrar Tədarük və Təchizat” ASC-nin, Azərbaycan Xurma İstehsalçıları və İxracatçıları Assosiasiyasının, “Balxurma” MMC-nin dəstəyi ilə reallaşan festivalda xurmadan hazırlanmış geniş çeşiddə məhsullar nümayiş etdirilib. Mərasimdə müxtəlif müsabiqələr, yarışlar təşkil olunub. Bundan başqa, rayonda yaşayan azsaylı xalqların adət-ənənəsi, mətbəxi və rəqsləri festivala qatılanlar tərəfindən maraqla qarşılanıb.
Festivalda ölkəmizdə fəaliyyət göstərən bir sıra xarici ölkə səfirliklərinin təmsilçiləri, nazirlik və dövlət qurumlarının nümayəndələri, Milli Məclisin deputatları, qonşu rayonlardan gəlmiş qonaqlar, xurma istehsalçıları və ixracatçıları, həmçinin rayon sakinləri iştirak ediblər.
Eyni zamanda Gərəkli kəndinin ərazisində yerləşən xurma bağına ekskursiya olunub, xurma ağacları əkilib.
Festivalın rəsmi açılış mərasimindən sonra qonaqlar və rayon sakinləri parkda xurmadan hazırlanmış kompozisiyalara və kulinariya məhsullarına baxaraq, rayonda istehsal edilən kənd təsərrüfatı və sənaye məhsullarının sərgiləri ilə tanış olublar.
III Xurma festivalı konsert proqramı ilə başa çatıb.
