BAKI, 19 noyabr — Sputnik. Sumqayıt şəhərinin 70 illiyinə həsr olunmuş ümumşəhər tədbiri keçirilib.
Sputnik Azərbaycan xəbər verir ki, tədbirdə Sumqayıt şəhər İcra Hakimiyyətinin başçısı Zakir Fərəcov, Dövlət Sərhəd Xidmətinin rəisi general-polkovnik Elçin Quliyev, millət vəkilləri, Sumqayıtla qardaşlaşmış şəhərlərin nümayəndələri, ictimaiyyət nümayəndələri və on minlərlə şəhər sakini iştirak ediblər.
Şəhərin yubileyinə həsr edilmiş bayram tədbiri Sumqayıt şəhər İcra Hakimiyyətinin qarşısında, Azərbaycan prospektində baş tutub.
Tədbir çərçivəsində Azərbaycan prospekti boyunca Dövlət Sərhəd Xidmətinin hərbi orkestrinin müşayiəti ilə həbçilərin hərbi keçidi olub. Keçid zamanı həmçinin Dövlət Sərhəd Xidmətinin malik olduğu müasir silahlar da nümayiş olunub.
Bununla yanaşı, sənaye müəssisələri, şəhərdə fəaliyyət göstərən idarə, müəssisə və təşkilatlar öz kollektivləri ilə bayram əhval-ruhiyyəsində keçid ediblər.
Qeyd edək ki, bu il Sumqayıt şəhərinin yaranmasının 70 illiyi qeyd olunur. 1949-cu ildə Azərbaycan SSR Ali Soveti Rəyasət Heyətinin qərarı ilə Sumqayıta şəhər statusu verilib.
