BAKI, 20 noyabr — Sputnik. Bu gün Bakının Xətai və Nizami rayonlarında qaz verilişində fasilələr olacaq.
Bu barədə Sputnik Azərbaycan-a "Azəriqaz" İstehsalat Birliyindən verilən məlumatda deyilir. Qurum "CNG", yəni sıxılmış təbii qazla işləyən avtomobillərin sahiblərini sevindirməyə hazırlaşır. Xətai rayonu, Nobel prospekti 22-34 saylı məhəllədə yerləşən “SOCAR Petroleum” QSC-yə məxsus 21 saylı yanacaqdoldurma məntəqəsinin "CNG" sistemləri üçün çəkilmiş, diametri 159 mm olan yüksək təzyiqli daşıyıcı qaz xətti qaz təchizatı mənbəyinə birləşdiriləcək. Bu işin icrası üçün saat 10:00-dan etibarən Xətai rayonunun böyük bir hissəsində qaz təchizatının müvəqqəti olaraq dayandırılmasına zərurət yaranıb.
Nizami rayonunda isə istilik təchizatı ilə bağlı yaranan problem aradan qaldırılacaq. “Azəristiliktəchizat” ASC-yə məxsus 344 saylı qazanxananı təbii qazla təmin edən orta təzyiqli qaz kəməri üzərində quraşdırılmış istismara yararsız siyirtmə yenisi ilə əvəzlənəcək. Bu zaman saat 10:00-dan etibarən Nizami rayonunda qazın verilişində fasilələr müşahidə ediləcək.
