İradə Cəlil, Sputnik Azərbaycan
BAKI, 6 iyun — Sputnik.
Pirşağı qəsəbəsində dairəvi yolun sağ tərəfində bir qəbiristanlıq və qəbiristanlığa bitişik bir göl var. Zamanla gölün bir hissəsi qurudulub. Göl qurudulduqca qəbiristanlığa doğru meyl alıb. İndi demək olar ki, məzarların bir hissəsi suyun içindədir.
Lakin acınacaqlı məqam başqadır. Uzun müddətdir ki, burada Pirşağı, Kürdəxanı və başqa kəndlərin vətəndaşları balıq tutur.
Bu günlərdə yolum yenə həmin ərazidən düşmüşdü. "Balıqçılara" yaxınlaşıb, məlumat almaq istədim. Dedilər ki, bundan sadəcə məşğuliyyət, boş zamanını dəyərləndirmə, əsəblərini sakitləşdirmək üçün istifadə edirlər.
Yəni tutduqları balıqları yemir və ya satmırlar. Ancaq burada tutduğu balığı evinə apardığını deyən də oldu.
Kürdəxanı sakini olduğunu deyən 43 yaşlı İntiqam Həsənovun sözlərinə görə, bir neçə ildir ki, buradan balıq tutur: "Həm əsəblərim sakitlərşir. Həm də axşam evə əlidolu gedirəm. Balıq insan orqanizmi üçün faydalıdır. O ki, qaldı göl suyuna, bu 3 ildə heç nə olmayıbsa, bundan sonra da olmaz".
Kənd sakini deyir ki, bu gölə balıq tutma qadağası qoysalar, bu bir çox adama zərər verə bilər. Çünki imkansız insanlar var ki, məhz ailələrini bu göldən tutduqları balıqla saxlayırlar.
Həkim terapevt Məlahət Abbasova Sputnik Azərbaycan-a açıqlamasında bildirib ki, ümumiyyətlə göl balığı insan sağlamlığı üçün təhlükəlidir: "Oradan tutulan balıqlar kanalizasiya qoxusu verir. Ərazidə sizin qeyd etdiyiniz kimi qəbiristanlıq olmasa belə, həmin yerin balığı sağlamlıq üçün qorxuludur. Çünki gölün suyu axarlı olmur. Göllər təsərrüfat və məişət suları, yağış suları, yeraltı lay suları hesabına formalaşır".
Həkim əlavə edib ki, əgər ərazidə qəbiristanlıq varsa, bu həmin gölün məhsulunu bir qədər də təhlükəli edir. Çünki insan öldüyü zaman cəsəddə müxtəlif mikrob və bakteriyalar əmələ gəlir: "Əgər gölün suyu məzarlara daxil olursa, deməli su da belə mikroblarla zənginləşir. Oradan tutulan balıq da mikrob və bakteriyalı olur. Bu səbəbdən də məsləhət görərdim ki, vətəndaşlar belə göllərdən balıq tutmasın, belə balıqla qidalanmasınlar.
Məsələ ilə bağlı qida eksperti Elsevər Fərzəliyevlə də danışdıq.
Onun sözlərinə görə, bu qəbirlərdə insanlar uyuyursa, onların çürüməsində iştirak edən bütün virus və bakteriyalar suya keçə bilər: "Bu isə orada yaşayan bütün canlılar üçün real təhlükədir. Cəsədlərin çürümə prosesi indi daha intensiv baş verir. Bununla bağlı təcili olaraq Səhiyyə Nazirliyi ayağa qalxmalıdır. Çünki kütləvi xəstəliklər yarana bilər".
