BAKI, 14 avqust — Sputnik. Bu il avqustun 3-də qardaşı, Çevik Polis Alayının əməkdaşı, polis sejantı Əliyev Murad Ramazan oğlunu qətlə yetirmiş Bakı sakini ələ keçib. Bu barədə Sputnik Azərbaycan-a hüquq-mühafizə orqanlarından xəbər veriblər.
Xatırladaq ki, qətl paytaxtın 9-cu mikrorayonunda, Murad Əliyevin yaşadığı ünvanda baş verib. Axşam saat 5 radələrində Əli Əliyev qardaşına ürək nahiyəsindən üç bıçaq zərbəsi endirərək hadisə yerindən qaçıb.
Ötən bazar günü axtarışa verilmiş Əli Əliyev Sabunçu rayonunun Maştağa qəsəbəsindəki 7 saylı Şəhər Kliniki Xəstəxanasında aşkar edilib. Məlum olub ki, avqustun 11-də Əliyev Qaradağ rayonunun ərazisində huşsuz vəziyyətdə tapılaraq xəstəxanaya gətirilib. Əliyev qardaşının qətlindən sonra özünü öldürməyə cəhd edib.
Hazırda fakt üzrə Binəqədi rayon prokurorluğu tərəfindən başladılmış araşdırma davam etdirilir.
