Bir gündə doğulub, bir gündə ölmədilər, ancaq hamısı Vətən üçün bir qəhrəman oldu.
Bu gün Azərbaycanın Milli Qəhrəmanı, jurnalist Çingiz Fuad oğlu Mustafayevin anadan olmasından 60 il ötür. Məhz Çingiz Mustafayevin Xocalı qətliamı haqqında çəkdiyi filmlə Ermənistanın reputasiyası bütün dünyada ciddi sarsıntıya məruz qalıb. Ümumilikdə Çingiz Mustafayev səkkiz ay ərzində Qarabağ müharibəsi haqqında 18 sənədli film çəkib.
Bundan əlavə, Çingiz Mustafayevin əsasını qoyduğu "215 KL" studiyasında reportajları informasiya blokadasında olan Azərbaycan haqqında gerçəkliklərin ABŞ və Avropanın aparıcı teleagentlikləri və televiziyalarına yol tapmasına vasitəçi olub.
O, 1992-ci ilin iyun ayının 15-də Xocalı rayonunun Naxçıvanlı kəndində çəkiliş zamanı aldığı mərmi yarasından həlak olub. Bundan bir neçə ay sonra Çingiz Mustafayevə Azərbaycanın Milli Qəhrəmanı adı verilib.
1992-ci il noyabrın 6-da Prezident fərmanı ilə Ç.Mustafayevlə yanaşı, daha bir neçə jurnalistimiz bu yüksək ada layiq görüldü. Amma təəssüf ki, onların heç biri həyatda deyildi.
Ölkəmizin şəhid, Milli Qəhrəman olan jurnalistləri haqda məlumatları Sputnik Azərbaycan-ın xüsusi infoqrafikasında oxuya bilərsiniz.
