İlham Əhmədov, Sputnik Azərbaycan
BAKI, 8 iyun - Sputnik. İki gündür davam edən dəyişkən hava şəraiti şimal-qərb bölgəsində şəxsi təsərrüfatlara ciddi ziyan vurub.
Anidən başlayan leysan yağışı sel və daşqınlara səbəb olub. Küləkli hava və dolu olması əsasən Oguzun və ətraf rayonların kəndlərində ciddi fəsadlarla nəticələnib. Ən böyük fəsadlar Oğuz rayonunun Yaqublu, Kərimli və ətraf kəndləri, eləcə də rayonun Xaçmaz kəndində olub. Yaqublu kəndində sel nəticəsində həyətyanı sahələrə, əkin sahələrinə və bostanlara ciddi ziyan vurub və bostanları yuyub. Yaqubluda əkilmiş 5 ha sahədəki sarımsaq tarlasına, eləcə də əkin sahəsinə ciddi ziyan dəyib. Bununla yanaşı, rayonun digər kəndlərində də güclü külək nəticəsində ağaclara və meyvə bağlarına ziyan dəyib.
Xaçmaz kəndində həftə ərzində bir neçə dəfə dolu yağışı meyvələrin tələf olması ilə nəticələnib. Güclü yağıntı bağlarda və əkin sahələrində ciddi fəsadlar yaradıb.
Yağıntılar dünən günortadan sonra və gecə saatlarında daha güclü olub və ildirim çaxmaları ilə müşahidə olunub.
