BAKI, 29 iyul — Sputnik. Rusiya, ABŞ və Belçika alimləri beyindəki fizioloji proseslərə neqativ təsir göstərən peşələri araşdırıblar.
Sputnik Azərbaycan RİA-Novosti-yə istinadən bildirir ki, müstəqil şəkildə aparılan araşdırmalar kosmonavtların beyinlərinin alın və ənsə hissəsindəki mərkəzi zoğun daraldığını, böyük yarımkürələrin qabığının qafa tasının yuxarı hissəsinə çəkildiyini və ənsə paylarında onurğa beyni mayesinin sirkulyasiyasının pozulduğunu ortaya çıxarıb. Üstəlik, dəyişikliklərlə BKS-də (Beynəlxalq Kosmik Stansiya) olma müddəti arasındakı aşkar əlaqə də ortaya çıxıb.
Bundan başqa, gicgah nahiyəsində boz maddənin müvəqqəti olaraq 3%-dək, həmçinin ağ maddənin bərpa olunmayacaq həddə qədər azalması müşahidə olunub.
Taksi sürücülərində isə əks effekt baş verir - bu sənətin sahibləri peşəyə yiyələnərkən beynin hippokamp şöbəsi (qısamüddətli yaddaşın uzunmüdətli yaddaşa keçməsini, emosiyaların yaranma mexanizmini təmin edən şöbə) azacıq böyüyür. Alimlər hesab edirlər ki, bu, çoxsaylı marşrutların və əlavə yolların yadda saxlanılması zərurətindən doğur. Ancaq naviqatordan istifadəyə başlayanda əks proses işə düşür, çünki qadcet hippokampı əvəz edir, marşrut variantlarını beyin əvəzinə cihaz müəyyənləşdirir.
