BAKI, 18 may — Sputnik. Beynəlxalq Futbol Federasiyası (FİFA) 2026-cı il Dünya Çempionatının loqosunun təqdimat mərasimini keçirib.
Bu barədə Federasiyanın saytında məlumat verilib.
Turnirin loqosunda ilk dəfə olaraq Dünya Çempionatının real təsviri, eləcə də çempionatın keçirildiyi il əks olunacaq. Daha sonra yarışlara ev sahibliyi edəcək şəhərlərin 16 loqosu təqdim olunacaq.
Tədbir Los-Ancelesdəki Qriffit Rəsədxanasında FİFA Prezidenti Canni İnfantino, Braziliya yığmasının tərkibində olan ikiqat dünya çempionu Ronaldo, Meksika millisinin sabiq qapıçısı Xorxe Kampos, Kanada komandasının keçmiş qapıçısı Kreyq Forrestin və ABŞ milli komandasının tərkibində olan ikiqat dünya çempionu Karli Lloydun iştirakı ilə baş tutub.
Qeyd edək ki, 2026-cı il futbol üzrə Dünya Çempionatı üç ölkədə - ABŞ, Kanada və Meksikada keçiriləcək və bu, 48 komandanın iştirak etdiyi ilk yarış olacaq.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.